Polıtseıdiń jumysy erte bastalyp, tún ortasynda aıaqtalady - Maqsat Ishbergen
«Tańerteń jınalysta joǵalyp ketken adamdy tabý týraly tapsyrma aldyq. Munaıly aýdanynyń turǵynyn týystary izdegen. Tapsyrmany alǵannan keıin Aqtaý qalasy Polıtsııa basqarmasynyń JBO beınebaqylaý ınspektory polıtsııa aǵa leıtenanty Danııar Baımuratovpen birge izdeý jumystaryn júrgizip, joǵalǵan adamǵa uqsas adamdy taptyq. Ol úıdiń aýlasyndaǵy oryndyqta otyrdy. Sodan keıin onyń janyna bardyq. Ol kisiden baryp, suraq qoıyp, jeke basyn anyqtaý úshin ony 13 shaǵyn aýdannyń ýchaskelik pýnktine jetkizdik. Er adamnyń jaǵdaıy jaqsy, keıinirek ol Munaıly aýdandyq polıtsııa qyzmetkerlerine tapsyryldy. Sol jerden týystary ony úıine alyp ketti», - deıdi Maqsat Ishımov QazAqparat tilshisine.
Polıtsııa kapıtany Maqsat Ishbergen bala kezinen polıtsııa qyzmetkeri bolýdy armandaǵan. Ol 2010 jyly Sh.Esenov atyndaǵy Kaspıı memlekettik tehnologııalar jáne ınjınırıng ýnıversıtetin támamdaǵan. Ol 2017 jyldan bastap Maqsat Ishbergen 2 shaǵyn aýdannyń ýchaskelik ınspektory bolyp jumys istegen. Odan keıin 13, 17, 18, 18a jáne 20 shaǵyn aýdandardyń aǵa ýchaskelik ınspektory bolyp taǵaıyndaldy. Búginde ol 25 myńǵa jýyq adamnyń tynyshtyǵyn kúzetip, qaýipsizdigin qadaǵalaıdy.
Maqsat Qýandyquly óziniń jumys kúni tańerteń erte bastalyp, tún ortasynda aıaqtalatyny týraly aıtty.
«Polıtsııa kapıtany jumys kúnin bastardan buryn platsqa attanady. Munda jalpy nusqaýlyq ótedi. Qyzmetkerlerge táýlik ishinde tirkelgen qylmystar men oqıǵalar týraly aqparat beriledi. Polıtseıler naqty tapsyrmalardy alyp solardy sheshý maqsatynda jumys isteıdi.
Biz barǵan kezde Maqsat Ishbergenniń jumys ústelinde 30-dan astam ákimshilik quqyq buzýshylyq, qylmystyq isterge qatysty materıaldar turdy. Olar boıynsha tekserýler birneshe kún ishinde aıaqtalýy tıis.
Jumys kúninen keıin túngi saǵat 11-de Maqsat úıine asyǵady. Úıinde jan jary men qos qarlyǵashy qyzdary ákesin kútedi. Tańerteń polıtsııa qyzmetkeri qaıtadan qyzmetine kirisedi.
Pandemııa kezinde polıtseıler kúsheıtilgen jumys rejımine kóshkeni belgili. Eki, úsh aýysymda jumys istedi. Mańǵystaý oblysy Polıtsııa departamentiniń basshysy general-maıor Janarbek Baqtybaev tótenshe jaǵdaı jáne karantın kezinde erekshe kózge túsken polıtseılerdi marapattady. Olardyń arasynda Maqsat Ishbergen de boldy. Sonymen qatar, oblys jáne Aqtaý qalasy ákimderinen «Qoǵamdyq tártipti qamtamasyz etýge qosqan úlesi úshin» alǵys hatyna ıe bolǵan.