Polıtseıdiń soqqysy: Oqýshynyń anasy balasynyń ne úshin jazalanǵanyn aıtty
AQTÓBE. QazAqparat -Aqtóbede №2 orta mektep oqýshysyn urǵan polıtsııa qyzmetkerine qatysty tergeý toqtatylmaıdy. Oqýshynyń anasy aryz jazyp, dırektor men onyń orynbasaryn jazalaýdy surady, dep habarlaıdy QazAqparat tilshisi.
Aqtóbede mektep ınspektoryna qatysty tergeý jumystary júrip jatyr. Buǵan deıin habarlaǵanymyzdaı, oqýshy ınspektor soqqysynan soń medıtsınalyq kómek alǵan. Al búgin 10 synyp oqýshysynyń anasy aty-jónin jasyryp, oqıǵanyń mán-jaıyn jýrnalısterge aıtyp berdi.
«Sol kúni birinshi sabaq dene shynyqtyrý bolǵan soń balam sporttyq kıimmen mektepke bardy. Jeıdesin sómkesine salyp, shalbaryn umytyp ketken. Keıin sabaqqa qatysa berýdi jón kóredi. Sol kezde mektep dırektorynyń orynbasary kórip, birneshe balany mektep ınspektoryna aparady. Sol jerde ınspektor oqýshylarǵa balaǵat sóz aıtqan. Ulym nege balaǵat sóz aıtqanyn suraǵan kezde barlyǵyn shyǵaryp jiberip, ózin alyp qalady. Esikti ishten kilttep, urǵan. Betinen urǵanda basyn qabyrǵaǵa soǵyp alǵan. Buǵan qosa ishinen soqqylap, moınynan qylǵyndyrady. Taǵy 2 mınýt bolǵanda balamnan aıyrylatyn edim. Bul týraly aldymen mektep dırektorynyń orynbasary bilip, maǵan habarlaspaýyn surady. Eki sabaqtan keıin medıtsınalyq kabınetke aparyp, basyna, moınyna muz basty. Bar kómegi osy. Degenmen biz oblystyq balalar aýrýhanasyna baryp, densaýlyǵy týraly anyqtama aldyq»,- dedi oqýshysynyń anasy.
№2 orta mektep oqýshysyn balalar aýrýhanasyna aparǵan soń dárigerler polıtsııa qyzmetine habar berdi. Keıin oqýshynyń ata-anasy polıtsııa bólimine baryp, eshqandaı renish bildirmeıtinin jazyp, aryz qaldyrady.
«Balam sabaǵyna baryp júr. Oılana kele, polıtsııaǵa aryz jazyp, mektep ınspektoryna, mektep dırektory men onyń orynbasaryna qatysty zań aıasynda shara qoldanýdy suradym. Eshqandaı da kelisim, keshirim bolmaıdy»,- dedi oqýshynyń anasy.
