Polıtseıdiń pogonyn julyp alǵan turǵyn qamaýǵa alyndy
TALDYQORǴAN. QazAqparat - Polıtseıdiń pogonyn julyp alǵan turǵyn qamaýǵa alyndy. Oqıǵa Almaty oblysynda bolǵan, dep habarlaıdy QazAqparat tilshisi.
Kerbulaq aýdanyna qarasty Qosaǵash aýylynyń turǵyny ýchaskelik ınspektorǵa qarsylyq kórsetip, pogonyn julyp alǵan. Anyqtalǵandaı, aqpannyń 28-ne qaraǵan túni gaz balonyn tasymaldaıtyn kóliktiń júrgizýshisi aýyl ishinde jyldamdyqty asyryp, oıran salǵan.
«Atalǵan azamat aýyldyń bir shetinen tabyldy. Іshimdik ishken júrgizýshi birden polıtseıge qarsylyq kórsetip, aıtqanyna baǵynbaǵan. Osyǵan qaramastan, aýyldyń tártip saqshysy ony ustap aýdandyq polıtsııa bólimine jetkizdi», dep habarlady oblystyq ІІD baspasóz qyzmeti.
Buzaqy polıtseıdiń pogonymen qatar formasynyń túımelerin de julyp alǵan. Qazir atalǵan fakti boıynsha is qozǵaldy.
