Polıtseıdi urǵan mas adamǵa qatysty isti prokýratýra qaıta qolǵa aldy

ALMATY. QazAqparat - Almaty Polıtsııa departamenti negizsiz toqtatylǵan is boıynsha Medeý aýdandyq prokýratýrasyna isti qaıta qaraý týraly aryz túsirdi, dep habarlaıdy QazAqparat tilshisi. 

QR ІІM resmı ókili Almas Sadýbaevtyń aıtýynsha, WhatsApp jelisinde tarap ketken vıdeo bıyl qańtarda Almatydaǵy narkologııalyq dıspanserde bolǵan.
Mas er adamdy polıtsııa medıtsınalyq saraptamadan ótkizý úshin narkodıspanserge alyp kelgen. Er adam sol jerde polıtseıge qol kóterip, balaǵattaǵan.
«Atalǵan derek boıynsha Medeý aýdandyq ІІB QR QK 378-babynyń 1-bólimine sáıkes sotqa deıingi tergeý jumystaryn bastaǵan edi. Keıin is qylmys quramynyń joqtyǵynan toqtap qaldy. Qazirgi tańda Almaty polıtsııa departamenti Medeý aýdandyq prokýratýrasyna atalǵan isti qaıta qozǵaý týraly ótinish tastady. Qylmystyq istiń negizsiz toqtatylýyna baılanysty sotqa deıingi tekserý bastaldy. Aıypty tulǵalar jaýapkershilikke tartylady», - dedi Almas Sadýbaev.