Polıtseıdi kapotynda súıregen júrgizýshi ustalyp, qylmystyq is qozǵaldy
QYZYLORDA. QazAqparat – Qyzylorda oblysynda polıtsııa qyzmetkerin kóligimen súıregen júrgizýshi ustaldy, dep habarlaıdy QazAqparat tilshisi.
Oqıǵa 3 qarashada Qyzylorda qalasynda boldy. Sol kúni WhatsApp áleýmettik jelisinde aq tústi «Lada Granta» kóliginiń júrgizýshisi polıtsııa qyzmetkerine qarsylyq kórsetken vıdeo tarady. Onda júrgizýshi kóliginiń kapotynda polıtseıdi birneshe metr jerge súıregeni kórinedi.
Anyqtalǵandaı, qalalyq Polıtsııa basqarmasynyń patrýldik polıtsııa batalony ınspektory 36 jastaǵy turǵyn tizgindegen avtokólikti jol belgisi erejesin saqtamaǵany úshin toqtatqan. Qujattardy tekserý barysynda júrgizýshi polıtsııa qyzmetkeriniń zańdy talabyna baǵynbaǵan. Ol oqıǵa ornynan óz kóligimen qashyp ketýge tyrysqan. Ony toqtatýǵa tyrysqan polıtseıdi kólik kapotynda 5-8 metr jerge súıregen.
«Quqyq buzýshyǵa qatysty QR Ákimshilik quqyq buzýshylyq týraly kodeksiniń 601-baby 1-bóligi boıynsha jol belgilerimen nemese joldyń júrý bóligindegi tańbalarmen kórsetilgen talaptardy saqtamaǵany úshin ákimshilik quqyq buzýshylyq týraly hattama toltyryldy. Sondaı-aq, atalǵan derek boıynsha kólik júrgizýshisine qatysty QR Qylmystyq kodeksiniń 380-baby 1-bóligimen (Bılik ókiline qatysty kúsh qoldaný) sotqa deıingi tergep-tekserý amaldary bastaldy. Júrgizýshi ýaqytsha ustaý ızolıatoryna qamaldy. Qyzylorda oblysynyń Polıtsııa departamentiniń Ózindik qaýipsizdik basqarmasy atalǵan derek boıynsha qyzmettik tergeý bastady», - dep málim etti Qyzylorda oblystyq Polıtsııa departamentiniń baspasóz qyzmetinen.
