Polıtseıdi qaqqan astanalyq júrgizýshi zańnyń tórt baby boıynsha jaýapqa tartylady
ASTANA. QazAqparat - «Báıterek» monýmenti mańynda avtomobıl kapotynda polıtseıdi súıregen quqyq buzýshyǵa qatysty Astana Іshki ister departamenti pikir bildirdi, dep habarlaıdy QazAqparat.
Baspasóz qyzmetiniń habarlaýynsha, «Toyota Camry» avtokóliginiń 29 jastaǵy júrgizýshisine qatysty QR Ákimshilik quqyq buzýshylyqtar týraly kodeksiniń tórt baby boıynsha ákimshilik is qozǵaldy: 610-bap, 3-bólim (Kólik quralyn basqarýǵa quqyǵy joq júrgizýshiniń jolda júrý qaýipsizdigin qamtamasyz etý qaǵıdalaryn buzýy), 612-bap, 3-bólim (Kólik quralyn basqarý quqyǵynan aırylǵan júrgizýshiniń kólik quralyn basqarýy), 613-bap, 1-bólim (ІІB qyzmetkeriniń kólik quralyn toqtatý týraly zańdy talabyn oryndamaý) jáne 230-bap.
Sonymen birge, bılik ókiline baǵynbaý faktisi boıynsha sotqa deıingi tergeý jumystary júrip jatyr.
Atalǵan júrgizýshi 12 aı merzimge (2015 jyldyń qarasha aıynda) tehnıkalyq quraldardy basqarý quqyǵynan aıyrylǵan, dep habarlady baspasóz qyzmeti.
Eske sala ketsek, «Báıterek» monýmenti mańynda «Toyota Camry» júrgizýshisi ózin toqtatqan polıtsııa qyzmetkerin kóliginiń aldyndaǵy kapotqa salyp súıregen. Oqıǵanyń kýágeri bolǵan astanalyq Nurjan Berdishev óz kóligimen tártip saqshysyna zań buzýshyny qýyp jetýge kómektesti.
Zań buzýshy baǵdarshamnyń qyzyl túsine toqtamaı, úsh avtokólikpen soqtyǵysty jáne qamaýǵa alyndy, deıdi kýáger.
«Abyroı bolǵanda, eshkim zardap shekken joq. ІІD azamattyq pozıtsııasyn bildirip, quqyq buzýshyny qýyp jetýge kómektesken Nurjan Berdishevke alǵys bildiredi», - dedi QazAqparat tilshisine ІІD baspasóz qyzmetiniń jetekshisi Sofıa Qylyshbekova.
