Polıtseı turǵyndy qylmystyq jaýapkershilikten bosatý úshin para alǵan

KÓKShETAÝ. QazAqparat - Aqmola oblysy boıynsha Sybaılas jemqorlyqqa qarsy qyzmeti Kókshetaý qalasy Polıtsııa basqarmasy qyzmetkerleriniń sybaılas jemqorlyq quqyq buzýshylyqtaryn jasaýdyń sebepteri men jaǵdaılaryn joıý boıynsha onlaın beınekonferentsııa ótkizdi, dep habarlaıdy QazAqparat tilshisi vedomstvonyń baspasóz qyzmetine silteme jasap.

Beınekonferentsııada ishki ister organdarynyń jeke quramyna qylmystyq is sheńberinde QR QPK 200-baby negizinde engizilgen usynýlar túsindirildi.

Máselen, Qalalyq polıtsııa basqarmasy bólimsheleri biriniń laýazymdy tulǵasy qylmystyq jaýapkershilikke tartylmaǵany úshin azamattan 50 000 teńge kóleminde para alý ústinde áshkerelendi. Óz kezeginde, para berýshi memlekettik qyzmette qyzmet atqarý quqyǵynan ómir boıyna aıyra otyryp, aıyppul salýǵa jazalandy.

Sonymen qatar, Qalalyq polıtsııa basqarmasynyń tergeýshileri men jedel ýákilderine qatysty kúsh kórsetý jáne moraldyq qysym jasaý, salǵyrttyq, laýazymdyq ókilettikterin asyra paıdalaný, sondaı-aq quqyq buzýshylyqty jasyrý faktileri boıynsha qylmystyq ister aıasynda 8 usyný qaraldy.

Aldaǵy ýaqytta osyndaı quqyq buzýshylyqtarǵa jol bermeý maqsatynda zań buzýshylyqqa jol bergen kináli tulǵalarǵa qatysty tártiptik sıpattaǵy qatań sharalar qabyldaý, ujymda tıisti túsindirý jáne aldyn alý jumystaryn uıymdastyrý, baǵynyshty qyzmetkerlerdiń jumysyna vedomstvolyq baqylaýdy kúsheıtý, sondaı-aq sybaılas jemqorlyq táýekelderine keıinnen olardy joıý arqyly ishki taldaý júrgizý usynyldy.

«Ókinishke oraı, polıtsııa organdaryndaǵy sybaılas jemqorlyq qylmystar sany azaımaı tur. Tek sońǵy eki jyldyń ishinde osy salanyń laýazymdy tulǵalaryna qatysty oblystyq Sybaılas jemqorlyqqa qarsy qyzmettiń óndirisinde 76 qylmystyq is boldy. Quqyq qorǵaý organdary qyzmetkerleriniń tarapynan jasalǵan quqyq buzýshylyqtar memlekettik basqarýdyń bedeline nuqsan keltirip qana qoımaı, el azamattarynyń quqyqtary men bostandyqtaryn da buzatynyn túsiný qajet. Sybaılas jemqorlyqqa tózbeýshilik pen moraldyq-adamgershilik qasıetterdi saqtaý árkimniń minez - qulqy normasy bolýy tıis», - dep atap ótti aýmaqtyq Sybaılas jemqorlyqqa qarsy is-qımyl departamentiniń basshysy Murat Tóleýbaev.

Aıta keteıik, Departament ótken men aǵymdaǵy jyldar aralyǵynda júrgizilgen monıtorıng nátıjeleri boıynsha polıtsııa organdaryna 82 usyný jiberdi. Onyń sheńberinde 31 laýazymdy tulǵa tártiptik jaýapqa tartyldy, onyń ishinde 7-i qyzmetinen shyǵaryldy, 11-i atqaratyn laýazymynan bosatyldy.