Polıtseı tereńdigi 12 metrlik qubyrǵa túsip ketken balany qutqardy
ORDABASY. QazAqparat - Ordabasy APB qyzmetkerleri kásibı sheberlikteriniń arqasynda jas balanyń ómirin saqtap qaldy, dep habarlaıdy QazAqparat Túrkistan oblysy PD baspasóz qyzmetine silteme jasap.
Naqtyraq aıtsaq, Ordabasy APB-ǵa keshki saǵat 20:30 shamasynda kishkentaı bala habarlasyp, aǵasyna kómektesýlerin suraıdy. Habarlama alysymen osy aýmaqqa bekitilgen ýchaskelik polıtsııa ınspektory áreketke kóshedi. Oıyn tolyq jetkize almasa da balamen tildesip, qandaı da bir málimet alýǵa tyrysady. Degenmen ózine bekitilgen aýmaqtyń oı-shuqyryn tolyq biletininiń arqasynda, polıtseı az ýaqyttyń ishinde balanyń aıtqan jerine topshylap jetedi. Tártip saqshysy 12 jasar balanyń sý jınalatyn qubyrǵa túsip ketkenin anyqtaıdy. Sodan Badam aýylynyń ýchaskelik polıtsııa ınspektory polıtsııa kapıtany Sáken Saılanov birden jas balany shyǵarýǵa kirisedi. Qaınar aýylynyń syrtynda ornalasqan bul qubyrdyń tereńdigi 10 metrden asady. Osyǵan oraı polıtseı áriptesterin kómekke shaqyryp, ózi bala turǵan qubyrǵa túsedi. Qatty tońǵan balaǵa kıimderin kıgizip jylyndyrǵan. Osy aralyqta basqa tártip saqshylary arqan ákelip, bala aman-esen syrtqa shyǵarylady.
Belgili bolǵandaı, 12 jasar bala inisimen oınap júrip abaısyzda atalǵan beton shunqyrǵa túsip ketken. Ózdiginen ary-beri shyǵamyn dep birneshe saǵat talpynǵanmen esh nátıje shyqpaǵan. Sodan keıin inisine polıtsııaǵa habarlasýyn suraǵan. Oǵan qosa osy 2-3 saǵat ishinde oıynǵa shyqqan eki birdeı balasy joq bolǵannan keıin ata- analary, týystary men kórshileri de izdeýge shyqqan. Sońynda balalar aman-saý kúıinde otbasyna qaıtaryldy.
Óz kezeginde balasyn taýyp bergen tártip saqshylaryna aq jaýlyqty ana aqjarma tilegin arnap, jumystaryna tabys tiledi. «Aıaq asty oryn alǵan keleńsizdikte balamdy jalǵyz qaldyrmaı, qoldaýshy ári qutqarýshy bolǵandaryńyzǵa myń alǵys! Ásirese, ýchaskelik polıtseıimiz Sákenge raqmet aıtamyn»,-dep shynaıy rızashylyǵyn bildirdi.
