Polıtseı Sharyn shatqalynda oqýshyny qutqarý operatsııasy qalaı ótkenin baıandady
TALDYQORǴAN. QazAqparat – Almaty oblysynyń Sharyn shatqalynda selmen aǵyp ketken qyzdy izdestirý operatsııasyna qatysqan polıtseı oqıǵanyń mán-jaıyn baıandap berdi. Qutqarý jumystaryna Uıǵyr aýdandyq polıtsııa bóliminiń 50-ge jýyq qyzmetkeri qatysqan, dep habarlaıdy QazAqparat tilshisi.
Jasóspirimdi izdestirýdiń ekinshi kúninde Uıǵyr aýdandyq polıtsııa bólimi, tabıǵat qorǵaý polıtsııa tobynyń ınspektory Saıat Dárkenbaevqa qoryqshy ózen mańynda qozǵalystyń baıqaǵany týraly belgi bergen. Tártip saqshysy kómek shaqyrý úshin óz qyzmettik kóligimen bazaǵa kóterilgen. Artynsha tikushaqtaǵy qutqarýshylarǵa qyzdyń ornalasýy múmkin jerdi kórsete alatynyn aıtqan. «Áýe kóliginen Sharyn ózeniniń sol jaǵasynda, oqıǵa ornynan 3-4 shaqyrym jerde bir adamnyń jatqanyn baıqadyq. Alaıda ol jerge tikushaq qona almaıtyn bolyp shyqty. Shatqal bıiktigi shamamen 800-1500 metr. Ol jerdiń jaǵasy jartasty keledi. Men tikushaqtan shatqal úsinde túsip qalyp, úsh adamnan turatyn qutqarý tobyna ratsııa arqyly baǵyt-baǵdar berip turdym. Olar arqanmen ózenge qaraı túsip, joǵalǵan qyzdy joǵary kóterdi. Qyzdyń amandyǵyn kórip, qýanyshtan ata-anasyna birden ratsııa arqyly habar berdim. Qutqarýshy toptyń óte kásibı jumys istegenin atap ótkim keledi. Qarshadaı qyzdyń qarańǵyda, taýda basynan ne ótkergenin elestetý qıyn. Balapan tez jazylyp, ómirinde tek jaqsylyq bolsyn», - dedi polıtsııa qyzmetkeri Saıat Dárkenbaı.
Eske salaıyq, 29 mamyr kúni Almatynyń №199 mektebiniń 5-synybynda oqıtyn 8 oqýshy, 5 ata-ana jáne 3 muǵalim Sharyn shatqalyna saıahatqa shyqqan. Shatqalda kenet sel júrip, 2 adam mert boldy, 1 adam iz-túzsiz joǵalyp, taǵy 6-aýy zardap shekti.
Keıinnen QR Bilim jáne ǵylym mınıstrligi atalǵan oqıǵa saldarynan 1 oqýshy men 1 muǵalimniń qaza tapqanyn, taǵy bir oqýshyny izdeý jumystary júrgizilip jatqanyn málim etti.
Mert bolǵan ustaz - 26 jastaǵy Mereı Ibragımov kórkemóner pánderinen sabaq bergen. Eńbek ótili – 5 jyl.
30 mamyrda selge aǵyp ketken oqýshy qyz tabyldy. Qazir ol jansaqtaý bóliminde. Ony qutqarý sátinen vıdeo jarııalandy.
Búgin QR BǴM Balalar quqyǵyn qorǵaý komıtetiniń tóraǵasy Esenǵazy Imanǵalıev bul saıahat mektep ákimshiligimen kelisilmegenin málim etti.
