Polıtseı Rústem Bolatov: Jumys barysyndaǵy ustanymym: «búgin jasar isińdi erteńge qaldyrma»
NUR-SULTAN. QazAqparat - Qosshydaǵy blokposta qyzmetin atqarý barysynda 4 ret júkti áıelderge kómek kórsetip, olardyń perzenthanaǵa din aman jetýine jaǵdaı jasaǵan Rústem Bolatovty kópshilik bile bermeıdi. Ol da bul kómegin azamattyq paryzy, qyzmettik boryshy sanaıdy.
Búgin Qazaqstan polıtsııasy kúni bolǵandyqtan Rústemge arnaıy habarlasyp, tótenshe jaǵdaı kezinde qalaı jumys istegendigi, qoǵam tynyshtyǵy men qaýipsizdigin saqtaýda atqarǵan eńbegi jaıynda bilýge tyrysqan edik.
«Polıtsııa qyzmetkeri atanǵannan keıin moınyńa jaýapkershilik pen zor mindet júkteledi. Otanyńa, halqyńa qyzmet etý - paryzym. Degenmen, janyma jaqyn qyzmet bolǵannan keıin osy mamandyqty tańdaǵan edim»,- dedi polıtsııa maıory QazAqparat agenttigine bergen suhbatynda.
Nur-Sultan qalalyq polıtsııa departamenti Kadr saıasaty basqarmasy bastyǵynyń orynbasary Rústem Bolatov quqyq qorǵaý organdarynda qyzmet etkenine 11 jyl boldy. Qazirgi ýaqytta ol jeke quramnyń tárbıe blogyna jaýap beredi. Ol tótenshe jaǵdaı kezinde Qosshyda ornalasqan 6-shy blokpostqa jaýapty bolǵan edi.
«6-shy blokta naýryzdan bastap maýsym aıynyń basyna deıin tańǵy saǵat 9-dan keshki 18-00-ge deıin jumys istedik. Túrli jaǵdaılar oryn aldy. Blokposttan aı-kúni jetip, tolǵaǵy kelgen jas analardy alyp ótken kezderimiz de boldy. Olardy kúıeýleri, týystary blokpostqa deıin alyp keletin. Bosanatyn áıeldiń sýy ketip qalǵandyqtan jedel járdem kóligin kútýge ýaqyt bolmady. Jedel áreket etýge týra keldi. Sol kezde qyzmettik kólikpen 4 ret bosanatyn áıelderdi taıaý ornalasqan perzethanaǵa jetkizdik», - dep eske alady sol bir kúnderdi polıtsııa maıory.
Rústem Bolatov tótenshe jaǵdaı kezinde túrli tosyn jaıttarǵa kýá bolyp, birneshe ret quqyq buzýshylyqtyń aldyn aıtady. Atap aıtqanda, ol kólik quralyn mas kúıde basqaryp, blokposttan zańsyz ótpek bolǵan eki azamatty ustap, kóliginiń júk salatyn bóliginde tirkelgen myltyq pen birneshe pyshaq salyp júrgen azamatty bolǵa túsirgen.
«Menińshe, polıtsııa qyzmetkeri bul mamandyqqa sanaly túrde kelýi tıis. Ol óz eliniń patrıoty ári qyzmetine jan-tánimen berilgen bolýy tıis. Ádil bolýymen qatar isińniń naǵyz kásibı mamany bolý úshin ózińdi únemi damytyp otyrý qajet. Belgilengen erejelerdiń barlyǵyn múltiksiz oryndaýǵa tyrysamyn. Jumys barysyndaǵy ustanymym - búgin jasar isińdi erteńge qaldyrma», - dedi ol.
Sóz sońynda Rústem Bolatov barlyq áriptesterin kásibı merekelerimen quttyqtady.
«Barlyq áriptesime myqty densaýlyq, jumysta zor jetistik tileımin. Eń bastysy - Otanyńa abyroımen laıyqty qyzmet etý», - dedi polıtsııa maıory.
