Polıtseı Nurjan Omarov ІІ dárejeli «Aıbyn» ordenimen marapattaldy

ShYMKENT. QazAqparat - Shymkenttik polıtseı Nurjan Omarov ІІ dárejeli «Aıbyn» ordenimen marapattaldy. Ál-Farabı aýdandyq polıtsııa basqarmasy jergilikti polıtsııa qyzmeti ýchaskelik polıtsııa ınspektorynyń kómekshisine marapatty qalalyq Polıtsııa departamentiniń bastyǵy, polıtsııa polkovnıgi Eraly Jumahanbetov tabystady, dep habarlaıdy QazAqparat tilshisi.

Marapat Nurjan Omarovqa kólikti tonamaq bolǵan qylmyskerdi ustaǵany úshin berildi.

Eske sala ketsek, oqıǵa ótken jyldyń 17 qazanynda túski ýaqytta boldy. Qala ortalyǵyndaǵy avtoturaqtardyń birinde jolda ketip bara jatqan qos polıtseı kólikterdi timiskilep júrgen ekeýdi baıqap qalady. Tártip saqshylary kúdiktilerge jaqyndap, qujat suraǵanda álgi ekeýdiń tarapynan qarsylyqqa tap bolǵan. Polıtseıler olarǵa qujattaryn kórsetkende, seziktiler ony kózderine de ilmegen. Ózderin tanystyrýdan bas tartqan. Qyzmettik kólikke qaraı ótý týraly polıtseılerdiń ótinishinen keıin ekeýi eki jaqqa qasha jónelgen. Ekinshi kúdiktini qýyp ketken Nurjan Omarovtyń áreketi kóshedegi beınebaqylaý kamerasyna túsip qalǵan. Qashyp bara jatqan jigitti qýyp jetken polıtseıdi sezikti birneshe jerinen pyshaqtaǵan. Soǵan qaramastan ol qashqyndy tyrp etkizbeı ustap, polıtsııaǵa jetkizgen. Aǵa leıtenant kóp qan joǵaltyp, oǵan bir jarym saǵat boıy ota jasaldy.