Polıtseı «Kerýen» mańyndaǵy atyshýly jol apaty jaıly aıtyp berdi
ASTANA. QazAqparat - 2017 jylǵy 12 qarashada Astanada «Kerýen» saýda-oıyn-saýyq ortalyǵynyń mańyndaǵy jol-kólik oqıǵasy bolǵan jerge birneshe mınýttan keıin jetken ınspektor Sapar Úısinbaev sotta kýálik etti, dep habarlaıdy QazAqparat tilshisi.
«Men oqıǵa ornyna birneshe mınýttan keıin jettim. Barsam, júrgizýshi jerde otyr, adamdar soǵan nusqady. Qasynda aıaq kıimi jatty. Adamdar ol mas emes ekenin, aýyryp otyrǵanyn aıtty. Ol, bilmeımin, mas nemese aýrý adam sııaqty kórindi. Spırtti ishimdiktiń ıisi bilingen joq. Barǵan boıda vıdeotirkeýishti qostym», - dedi polıtsııa qyzmetkeri.
Polıtseı, dáriger bolmaǵan soń, aıyptalýshyda epılepsııa belgileri boldy ma, joq pa - kesip aıta almaıtynyn jetkizdi. Sonymen qatar sýdıa Qanat Dúısenbıev ınspektorǵa onyń burynǵy kýálikterin esine saldy.
«Kýágerlerdiń sózine qaraǵanda, epılepsııa ustamasy bolǵan, ony syrtqa súırep shyǵarǵanda, aýzynan kóbik shashylǵan», - dep qyzmetkerdiń úsh aı burynǵy sózin esine saldy sýdıa.
Óz kezeginde, S. Úısinbaev jol-kólik oqıǵasy 3 aı buryn bolǵandyqtan, keıbir jaıttar esinde joq ekenin aıtty.
Eske sala keteıik, 2017 jylǵy 12 qarashada «Kerýen» SOSO mańynda Infiniti avtokóligi eki jaıaý júrginshini qaǵyp, sonyń bireýi - Ásel Rymhanova aýyr halde aýrýhanaǵa jetkizilgen bolatyn, budan tys mashına turaqtaǵy birneshe kólikke de zaqym keltirgen.
