Polıtseı esh sebepsiz bozbalany atyp óltirdi
ASTANA. QazAqparat - AQSh-tyń Mıssýrı shtatyndaǵy Fergıýson qalasynda polıtsııa qyzmetkeri jol boıynda 18 jastaǵy bozbalany atyp tastady, dep jazady 24.kz.
Marqumnyń ata-anasynyń aıtýynsha, oqıǵa kezinde jas jigit Sent-Lýıstegi ájesiniń úıine bara jatqan.
Bul oqıǵa turǵyndardyń ashýyn keltirip, júzdegen adam Sent-Lýıs kóshelerine shyǵyp, narazylyq tanytty. Polıtseılerdiń aıtýynsha, shahardaǵy ahýal áli shıelenisip tur. Alaıda, tártip saqshylary oq atqan áriptesteriniń bul áreketiniń sebebin aıtpaı, esimin de atamaı otyr.
Oqıǵa ornyna 60-qa jýyq qaýipsizdik kúshteri qyzmetkerleri jumyldyryldy. Qazir qaqtyǵystar jaıly aqparat joq.
Marqumnyń anasy Leslı Makspadden bolsa bul jaǵdaıǵa sene alar emes. Ol: Meniń ulym eshqashan bireýge jamandyq jasamaǵan. Jasy nebári 18-de bolatyn. Mektepti endi ǵana bitirip edi, - dep botadaı bozdap otyr.
