Polıtseı Baǵlan Rymjanov: Tabıǵatty qorǵaý - úlken jaýapkershilikti talap etedi
TALDYQORǴAN. QazAqparat – Polıtsııa kúnine oraı Almaty oblysy PD jergilikti polıtsııa qyzmeti basqarmasynda tıisti qorytyndylar jasalyp, tabıǵat qorǵaý baǵytynda úzdik polıtseı anyqtaldy, dep habarlaıdy QazAqparat tilshisi.
Atap aıtqanda, úzdikter qatarynan Almaty oblysy PD Tabıǵat qorǵaý polıtsııasy tobynyń ınspektory Baǵlan Qanashuly Rymjanov kórindi.
«Bala kezimnen áskerı salada qyzmet etýdi armandadym. Osyǵan baılanysty sabaǵymdy jaqsy oqyp, sportpen shuǵyldandym. Bizdiń áýlettegi er adamdardyń kóbisi pogon taqty. Atam mılıtsııada qyzmet etken, ákem Qanash Rymjanov ýchaskelik ınspektor qyzmetin atqardy. Aıta keteıin, ákem Qaratal aýdanynyń qurmetti azamaty ataǵyna laıyqty boldy. Quqyq qorǵaýshy bolýyma qylmystyq izdestirý salasynda belgili adam, aǵamyz Talap Qadyrbaev kóbirek yqpal etti. Ol kisini úlgi tuttym. Sondyqtan bizdiń áýlette osy salada qyzmet etý dástúrli túrde jalǵasyp keledi», - dedi Baǵlan Rymjanov.
Aıta keteıik, B. Rymjanovtyń eki joǵary bilimi bar. Úılengen, eki balany tárbıelep otyr.
Polıtsııa kapıtany Rymjanov tabıǵat qorǵaý salasynda jaqsy kórsetkishterdi kórsetip keledi. Ótken jyly jeke izge túsý arqyly qylmystyq quqyq buzýdyń jeti faktisin anyqtady. 2020 jyly da ol eleýli istermen kózge kórindi.
Onyń jetekshiligimen oblystyń tabıǵat qorǵaý polıtsııasy bıylǵy 5 aıda 515 tártip buzý jaǵdaıyn anyqtap, onyń 60-y boıynsha qylmystyq is qozǵaldy, qalǵan 455-i ákimshilik quqyq buzý sanatyna jatqyzyldy.
Baǵlan Qanashulynyń atap ótýinshe, tabıǵatty qorǵaý – úlken jaýapkershilikti talap etedi.
