Polıtseı áıeldi zorlamaq bolǵan er adamnyń qylmysynyń aldyn aldy - Petropavl
ASTANA. QazAqparat - Petropavlda jumystan qaıtyp kele jatqan polıtsııa maıory boıjetkendi zorlamaq bolǵan er adamnyń qylmysynyń aldyn aldy, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
SQO ІІD-niń bastyǵy general-maıor Berik Bilálovke oblystyq qylmystyq ister jónindegi mamandandyrylǵan aýdanaralyq sotynyń sýdıasy Orazymbetovtyń atynan jeke qaýly kelip tústi.
Atalǵan sýdıa ózine kelip túsken qylmystyq isti qaraý barysynda qylmyskerdiń polıtsııa maıory Andreı Ýshakovtyń der kezindegi áreketiniń arqasynda qolǵa túskenin anyqtaǵan.
Atap aıtqanda, masaıǵan er adam oblys ortalyǵynda bir boıjetkenge tap berip, zormalaq bolǵan. Alaıda 22 jastaǵy qala turǵyny qylmyskerdiń shabýylyna qarsylyq tanytyp, qashyp ketpek bolǵan. Ol qylmyskerden sytylyp shyǵyp, ózi baıqap qalǵan polıtsııa qyzmetkerine habar bergen. Polıtsııa maıory Andreı Ýshakov qylmyskerdi qýyp jetip, qolyn qaıyryp, bólimshege alyp kelgen.
Jeke qaýlyda kásibı mindetin sheber atqarǵan quqyq qorǵaýshynyń eńbegi erekshe atalady. Sot óz qaýlysynda ІІD-niń bastyǵyna polıtsııa maıoryn kótermeleý qajettigin jetkizgen.
Qazirgi ýaqytta qylmystyq is aıaqtalyp, qylmysker 10 jarym jylǵa sottaldy.
«Sot korpýsyna polıtsııa qyzmetkerin nazardan tys qaldyrmaǵany úshin alǵys bildirgimiz keledi. Andreı ómirde qarapaıym adam, qyzmet babynda temirdeı tártipke baǵynady. Onyń jedel áreketi bizdi tań qaldyrǵan joq, óıtkeni, mundaı syn kezinde onyń jasqanyp qalmaıtynyn bilgenbiz», - deıdi Andreıdiń áriptesi polkovnık Igor Semenov.
