Polıtseı Arman Altaev: Pyshaq ustaǵan qaskóıdi toqtatý úshin qarý qoldanýǵa týra keldi
ÓSKEMEN. QazAqparat – Óskemen qalasynda masań kúıdegi er adam qolyna pyshaq alyp áıel men onyń kámelettik jasqa tolmaǵan 2 balasyn óltirmek bolǵan. Alaıda buǵan jedel áreket etken polıtsııa qyzmetkeri Arman Altaev tosqaýyl bola bildi. Tártip saqshysy oqıǵanyń búge-shúgesin QazAqparat tilshisine aıtyp berdi.
«Ótken jyly 2 qarashada polıtsııaǵa qońyraý shalǵan azamat kórshi úıde tóbeles bolyp jatqanyn aıtqan. Birden sol jerge attandyq. Podezdiń ishine kirsek aıqaý-shý, balalardyń jylaǵan daýysy estildi. Jetip barsam ekinshi qabattaǵy páterde 30-35 shamasyndaǵy erkek áıeldiń shashynan ustap, pyshaq tósep tur eken. «Toqta» dep aıqaı saldym. Muny estigen ol «Polıtseılerdi shaqyrypsyń ǵoı. Sol úshin seni óltiremin» dedi. Onyń qylmystyq áreketin toqtatý úshin tapanshany qoldanýǵa týra keldi», - deıdi Arman Altaev.
Tóbege oq atylǵan kezde abdyrap qalǵan er adam polıtsııa qyzmetkeriniń «Pyshaqty tasta» degen talabyn birden oryndaǵan. Tártip saqshysy lezde qımyldap, onyń qolyna kisen saldy.
«Áıel ol adammen áleýmettik jelide tanysypty. Áýel basta onyń osyndaı minezi bar ekenin bilmegen. Keýdesin qyzǵanysh kernegen qala turǵyny áıeldiń úıine jetip kelip, «Balalaryńmen qosa óltiremin» dep qorqytqan. Sol kúni erkektiń ishimdik ishkeni de anyqtaldy», - deıdi aǵa-leıtenant.
Arman Altaev 1992 jyly Ulan aýdany Qasym Qaısenov kentinde dúnıege kelgen. D.Serikbaev atyndaǵy ShQMÝ-dy «Jol qozǵalysyn uıymdastyrý» mamandyǵy boıynsha támámdaǵan ol búginde Óskemen qalalyq Polıtsııa basqarmasy polıtsııa patrýldik bóliminde aǵa ınspektor bolyp qyzmet etýde. Byltyr shańyraq kótergen tártip saqshysynyń áke atanǵanyna 2 aı bolypty.
