Polshanyń Memleket basshysy qazaqstandyq stýdentterdi maqtady
ASTANA. QazAqparat - Polsha Prezıdenti Andjeı Dýda Elbasy Nursultan Nazarbaevqa polıak ýnıversıtetterinde bilim alyp jatqan qazaqstandyq jastardy maqtady, dep habarlaıdy QazAqparat.
«Polıak tilinde jetik sóıleıtin Qazaqstannyń jas azamattarymen kezdesýdiń ózi bir ǵanıbet. Olardyń sany artyp kele jatyr. Tildi jetik bilýi Polshada birneshe jyl turyp, bilim alýlarynda dep bilemin. Jastar arasyndaǵy barys-kelistiń artqanyn qalaımyn. Ol tek stýdentterdiń arasynda ǵana emes bilim, onyń ishinde joǵary tehnologııalar salalaryndaǵy alys-beris bolǵany durys», - dedi Dýda Aqordada Elbasy Nursultan Nazarbaevpen keńeıtilgen quramdaǵy kelissózderden keıingi birlesken málimdeme jasaý barysynda.
Óz kezeginde Qazaqstan Prezıdenti polıak áriptesimen ótken kelissózder barysynda bilim jáne ǵylym máselesine de basa nazar aýdarylǵandyǵyn, búginde 700-den astam qazaqstandyq Polshanyń joǵary oqý oryndarynda bilim alyp jatqanyn aıtty. «Sonymen qatar ǵylym-bilim, mádenı-gýmanıtarlyq deńgeıdi damytýdy qoldaımyz ári bizdiń seriktestigimizdi jandandyrýdy da esten shyǵarmaımyz. Bul rette, Qazaqstanda turyp jatqan 32 myń polıak dıasporasynyń róli erekshe. Olar bizdiń azamattarymyz», - dedi Nursultan Nazarbaev.
Aıta keterligi, Polsha joǵary oqý oryndarynda 770-ten astam stýdent bilý alýda. Qazaqstannyń 27 joǵary oqý orny Polsha ýnıversıtetterimen yntymaqtastyq týraly ýaǵdalastyq jasaǵan. 2016 jyldyń 6 shildesinde eki el arasynda bilim salasyndaǵy yntymaqtastyq týraly úkimetaralyq kelisim kúshine endi.
