Polshanyń áıgili ansambli Kókshetaýǵa keldi
KÓKShETAÝ. QazAqparat - Kókshetaý qalasynda «Poıýşaıa Polonııa» 8-shi án festıvali ótti, dep habarlaıdy QazAqparat tilshisi.«Aqmola oblysy polıaktarynyń birlestigi» qoǵamdyq birlestiginiń uıymdastyrýymen ótken án baıqaýyna óńirdegi polıak dıasporasy qatysyp, óz ana tilderinde án saldy.
«Poıýşaıa Polonııa» dostyqtyń altyn kópirin jalǵaıtyn, ulttar arasyndaǵy kelisim men birlikti nyǵaıta túsetin, mán-maǵynasy tereńde jatqan festıval», - deıdi Aqmola oblystyq polıaktar birlestiginiń «Polıane» folklorlyq ansambliniń jetekshisi Lıýdmıla Sýhovetskaıa.
Sharaǵa Polshadaǵy balalardyń kóne ujymynyń biri «Detı Plotska» hartserlik (skaýttyq) án jáne bı ansambli arnaıy kelip qatysty. Atalmysh ansambl 72 jyldan beri úzdiksiz jumys istep keledi. 
«Detı Plotska» ansambliniń dırektory Mılke Tadeýshtiń aıtýynsha, birliktiń týyn bıik ustanǵan Qazaqstannyń salıqaly saıasaty maqtaýǵa turarlyq. Kókshetaýda qonystanǵan polıaktardyń óz dástúri men mádenıetin damytýǵa zor múmkindikteri bar. Polsha memleketiniń Plotsk qalasynan kelgen óner ujymynyń quramy 20 jasqa deıingi jas daryndardan turady. Óner kórsetken bıshilerdiń kontserttik kostıými, bı qımyldarynyń kúrdeliligi men sahnadaǵy mádenıeti kókshetaýlyqtardy tánti etti. Ónerpazdardyń ánderin jınalǵan qaýym zor yqylaspen qabyldap, erekshe qoshemetke bóledi.
Qonaqtarǵa Aqmola oblystyq fılarmonııanyń jeztańdaı ánshisi Bısara Mákenova dombyramen án aıtyp berdi.
