Polshanyń 90 jastaǵy turǵyny Qazaqstanda turatyn otbasyn izdeıdi
ASTANA. QazAqparat - Polshanyń 90 jastaǵy turǵyny Qazaqstanda turatyn otbasyn izdep jatyr. Altsgeımer aýrýynyń zardabyn tartyp otyrǵan Izabella ájeıdiń esinde Qazaqstanǵa deportatsııalanǵany ǵana bar. Bul týraly Kyzylorda-news.kz saıty jazdy, dep habarlaıdy QazAqparat.
Polıak azamaty Ýla Kotarba agenttikke áleýmettik jeli arqyly júginip, óziniń sheshesi Izabella Breste týǵanyn aıtqan. 30-jyldardyń aıaǵynda ákesi qamaýǵa alynǵannan keıin kishkentaı Izabella anasymen jáne ápkesimen birge Qazaqstanǵa jer aýdarylady. Aldymen Itýmen keńesine, artynsha ápkesiniń aýrýyna baılanysty Makınkadaǵy aýrýhanaǵa jiberilgen.
Baspanasyz júrgen olardy jergilikti turǵyn Ýstınıa Mırenchýk úıine ákelip, sońǵy nanyn bólisip jegen.
Soǵystan keıin Izabella Polshaǵa oralady. Biraq Ýstınıa ájeıdi umytpaı, hat jazyp turady. Kóp jyl boıy jazǵan hatyna jaýap bolmaı, tek 1970 jyly odan Makınkaǵa shaqyrǵan hat kelgen.
Kókshetaý áýejaıynda anasymen birge kelgen Izabellany Ýstınıanyń uly Petr kútip alady. Olar Makınkaǵa deıin ujymshardyń dırektory arnaıy jibergen mashınamen jetedi. Kópten kútken júzdesý bolyp, kól-kósir jas tógiledi, estelikter aıtylady. Keıinirek Petr inisimen birge Izabellanyń shaqyrýymen Polshaǵa baryp qaıtady.
Olar taǵy biraz ýaqyt hat-habar alysyp turady, biraq keıinnen baılanys úzilip qalady. Al olardyń hattary qazir saqtalmapty.
Qyzynyń aıtýynsha, Izabella Ýstınıa ájeı týraly kóp aıtady. Ózi, balalary jaıly bilgisi keledi. Qarııa Altsgeımer aýrýyna shaldyqqan. Onyń esinde Qazaqstanǵa kelgeni ǵana bar.
Ýla anasynyń armanyn oryndaý maqsatynda, búkil qazaqstandyqtardan Ýstınıa Mırenchýktyń otbasyn izdeýge kómektesýin suraıdy.
