Polshadaǵy Álem chempıonatynyń alǵashqy altynyn qytaılyq jeńip aldy
ALMATY. 21 qazan. QazAqparat - Aýyr atletıkadan Polshanyń Vrochlaý qalasynda 59 eldiń 317 sportshysy qatysqan Álem chempıonaty ótip jatyr. Jarystyń alǵashqy kúni keshe áıelder arasynda 48 kelige deıingi salmaqtaǵy medaldar toptamasy sarapqa salyndy.
Onda el namysyn qorǵaǵan Galına Momotova julqa kóterýde - 70, serpe kóterýde - 88 kelini baǵyndyryp 115 keli salmaqpen 13-oryndy qanaǵat tutty. Al qytaılyq Tıan ıAıýn 199 kelimen (115+84 kg) Álem chempıony, koreıalyq Lıan Chhýn Hva 186 kelimen (81+105) kúmis, meksıkalyq Karolına Valensıa Ernandes 158 kelimen (70+88) qola júldeger atandy.
Búgin áıelder arasynda 53 kelidegi, al erler arasynda 56 kelidegi jeńimpazdar anyqtalady. Bul saıysta el úmiti Margarıta Elıseevaǵa jáne Arlı Chonteı men Tımýr Hasarovqa artylyp otyr. Al erteń áıelder arasyndaǵy dodada 58 kg, erler arasynda 62 kg salmaqtaǵy úzdikterdiń esimderi anyqtalatyn bolady. Bul saıysta ulttyq qurama sapyndaǵy Sáýle Sádýaqasovaǵa senim artylmaq. Al erler arasyndaǵy bul dodaǵa qazaqstandyqtar qatyspaıdy. Arǵy kúni júldege talasý úshin Karına Gorıcheva (63 kg) men Albert Lınder ( 69 kg) jarys jolyna shyǵatyn bolady.
