Polshada zańsyz mıgranttar kirgizdi degen kúdikpen 500-den astam adam ustaldy

NUR-SULTAN. QazAqparat – Adam quqyqtary jónindegi Eýropalyq sot Polshaǵa onyń aýmaǵyna kirgen mıgranttardy qaıta shyǵarmaýǵa úndedi. Belarýs jaǵynda bolǵan mıgranttar nemis nómirleri bar kóliktermen shekaradan ótkizilgen. Osylaısha, sońǵy bes aı ishinde Polshaǵa bes myńǵa jýyq adam kirgen. Polsha polıtsııasy men shekara qyzmetkerleri úısiz qalǵan júzdegen adamdy tasyǵany úshin 500-den astam kúdiktini ustaǵan, dep habarlaıdy QazAqparat Euronews agenttigine silteme jasap.

«Kóbine Polshada zańdy túrde turaqtanǵan Ýkraına jáne Grýzııa azamattary mıgranttardy zańsyz tasymaldaýmen aınalysady. Olardyń qatarynda bizdiń elde turaqty turýǵa quqyǵy bar sırııalyqtar men ıraktyqtar bar. Ókinishke oraı, mundaı isterge sheteldikter de, Polsha azamattary da baryp jatyr», - dedi shekarashylardyń biri.

Keıbir mıgranttardyń Polshada qalǵysy keledi, qalǵandary batysqa qaraı jol tartýǵa tyrysyp baǵýda. Mysaly, Irak azamaty ári qaraı Germanııaǵa ketý maqsatymen Polsha-Belarýs shekarasyn kesip ótken.
«Meniń otbasym qazir Germanııada turady, - dedi ol. – Otbasymmen qaýyshqym keledi. Osylaı qorqynyshty tústegideı qınalý – meniń tańdaýym emes. Irakta qalý ómirime qaýipti boldy».
Keıbireýler óz betinshe jol tabýǵa tyrysýda, qalǵandary EO elderinde turatyn týystarynyń kómegine júginýde. Mıgranttarmen jumys isteıtin zańger Vıtold Klaýs bul jaǵdaıdyń mıgranttardyń otbasyna qalaı áser etetinin túsindirdi.
«Bári qatal: segiz jylǵa bas bostandyǵynan aıyrý qarastyrylady. Biz mıgranttardy tasymaldaýdy kim uıymdastyryp júrgenin bilmeımiz. Árıne, buǵan mıgranttar otbasynyń qatysy bar. Biz buny bilemiz, sebebi kóbi ormanda adasyp ketken týystaryn izdestirip jatyr».
Shekarany kesip ótý jaǵdaılary azaıyp keledi, alaıda Polsha tarapynan kómek kórsetýshi belsendilerdiń aıtýynsha, shekaradan ótkender ormanda jasyrynatyn kórinedi. Biraz otbasy EO-nyń shyǵysynda iz-túzsiz joǵalyp ketken týystaryn izdestirýde.
Polsha úkimetiniń habarlaýynsha, jaqyn arada Belarýs-Polsha shekarasynda qorǵan salý jumystary bastalady. Polsha bul óńirge 20 myń shekarashyny qoıyp, Ulybrıtanııa jáne Estonııanyń kómegimen shekarany tolyqtaı jaýyp, ony zańsyz kesip ótýdiń aldyn almaq.