Polshada mysyqtardan qus tumaýy anyqtaldy
VARShAVA. QazAqparat – Polshada 29 mysyq qustarda kezdesetin tumaý túrine uqsas A tumaýynyń vırýsyn juqtyrǵan bolyp shyqty, dep habarlady jeksenbi kúni Dúnıejúzilik densaýlyq saqtaý uıymy (DDSU).
Mysyqtardyń vırýsty qaıdan juqtyrǵany belgisiz, al epızootologııalyq tergeý jalǵasyp jatyr. Mysyqtarmen baılanysta bolǵan birde-bir adam vırýs juqtyrmaǵan, dep habarlaıdy QazAqparat «Novostı OON»-ǵa silteme jasap.
27 maýsymda Polsha bıligi DDSU-n elde mysyqtar qus tumaýynan ólip jatqanynan habardar etti. 11 shildege deıin 46 mysyq pen erkindikte júrgen bir qaraqaldan alynǵan taldaý zerttelip, 29-y A tumaýyn (H5N1) juqtyrǵany anyqtaldy.
Mysyqtardyń A vırýsyn (H5N1) juqtyrǵany buryn da habarlanǵan, biraq bir eldiń aýmaǵynda ınfektsııa juqtyrǵan mysyqtardyń osyndaı kóp bolýy alǵashqy jaǵdaı.
14 mysyqqa evtanazııa jasaldy, taǵy 11-i qaıtys boldy, keıingi ólim 30 maýsymda tirkeldi. 12 shildedegi jaǵdaı boıynsha, A(H5N1) vırýsyn juqtyrǵan mysyqtarmen baılanysta bolǵan birde-bir adam qandaı da bir belgilerdiń bar ekeni týraly habarlamady.
Infektsııa juqtyrǵan mysyqtarmen baılanysqan jalpy turǵyndardyń ony juqtyryp alý qaýpi tómen, al jeke qorǵanys quraldaryn paıdalanbaıtyn mysyq ıeleri men veterınarlarda tómennen birqalyptyǵa deıin.
Infektsııanyń qaıdan juqqanyna qatysty birneshe nusqa bar. Onyń ishinde mysyqtardyń vırýs juqtyrǵan qustar nemese olardyń aınalasymen tikeleı nemese janama baılanysyn, ınfektsııa juqqan qusty nemese taǵamdy jeýi múmkin ekenin atap ótýge bolady.
25 mysyq týraly aqparat bar. Ekeýi – kóshe mysyǵy bolǵan, 18-i balkonǵa shyǵý múmkindigi bar úı mysyǵy, al beseýi – qorshaǵan ortamen baılanysy joq úı janýary edi. Jeti mysyqtyń ǵana jabaıy qustarmen baılanysý múmkindigi boldy.
Qus tumaýy vırýsy, ádette, qustar arasynda taraıdy. Biraq H5N1 qus tumaýynyń bıologııalyq turǵyda adamǵa jaqyn sútqorektilerge juǵyp jatqanyna sarapshylar alańdap otyr. Bul jaǵdaı vırýs adamǵa juǵýǵa beıimdelýi múmkin ekenin bildiredi.
Sondaı-aq sútqorektiler juqtyrǵan jaǵdaıda adam men janýar úshin qaýipti jańa vırýstar paıda bolýy múmkin. BUU-nyń birqatar mekemeleri, onyń ishinde DDSU ótken aptada qazirgi qus tumaýynyń taralýymen kúresý sharalaryn bekitýge shaqyrdy.
2022 jyldan úsh qurlyqtaǵy on el sútqorektiler arasynda A(H5N1) tarap jatqanyn habarlady. Mundaı jaǵdaı basqa elderde bolýy múmkin, biraq tirkelmegen. A(H5N1) vırýsynan jerdegi sútqorektilermen qatar, Ispanııada qarakúzen fermalarynda, AQSh-taǵy ıtbalyq jáne Perý men Chılıdegi fermalarda ósetin teńiz sútqorektileri de zardap shegip otyr.
