Polshada «legıonerler aýrýynan» 14 adam qaza tapty
ASTANA. QazAqparat - Polshada Ýkraına shekarasyna jaqyn eldiń ońtústik-shyǵysyndaǵy Jeshýv qalasynda «legıonerler aýrýy» dep atalatyn bakterııalyq ınfektsııanyń órshýine baılanysty 14 adam qaıtys boldy jáne 150-den astamy aýrýhanaǵa tústi, dep habarlaıdy QazAqparat VVS agenttigine silteme jasap.
Jergilikti bılik legıonellez qozdyrǵyshynyń qalanyń sý qubyryna kirgen-kirmegenin tekserip jatyr, biraq naqty derek joq, deıdi.
«Biz eshteńe taba almadyq. Sebebi qala Ýkraınamen shekarada ornalasqandyqtan jáne osy elge qarý-jaraq jetkizý úshin mańyzdy kólik toraby bolǵandyqtan bılik aldyn alǵysy keldi», - dedi Polsha arnaıy qyzmetiniń ókili Stanıslav Jaryn Polsat telearnasyna.
Osy aptanyń basynda Jaryn ınfektsııanyń neden paıda bolǵanyn tergeýge polıak barlaý qyzmetiniń ókilderi qatysatynyn rastady.
«Biz onyń neden paıda bolǵanyn izdep jatyrmyz. Qazirgi ýaqytta ystyq jáne salqyn sý qubyrlary jelisin tekserip jatyrmyz», - dedi Adam Sıdor óńirlik sanıtarlyq baqylaý qyzmetinen.
Osy ýaqytqa deıin alynǵan 105 sý synamasynyń alǵashqy 18 synamasynan legıonellez bakterııalary tabyldy.
«Ázirge bul bizge juqtyrý kózi sý qubyry ekenin aıtýǵa múmkindik bermeıdi. Aldaǵy kúnderi belgili bolady», - dedi Sıdor.
Densaýlyq saqtaý organdary ókilderiniń aıtýynsha, aýrýdy týdyratyn bakterııa Jeshýv qalasynda jáne onyń aınalasynda 113 patsıentten tabylǵan. Qaıtys bolǵan jeti adam 64 pen 95 jas aralyǵynda jáne olardyń basqa da aýrýlary bolǵan.
