Polshada qazaq boksshylary 4 altyn medalge qol jetkizdi
ASTANA. QazAqparat - Polshanyń astanasy Varshava qalasynda bokstan «Felıks Shtam-2018» týrnıri aıaqtaldy. Qazaqstandyq boksshylar úshin týrnır sátti aıaqtaldy, dep habarlaıdy QazAqparat Sports.kz saıtyna silteme jasap.
Otandyq sportshylar atalǵan týrnırde tórt birdeı altyn medal ıelendi. Naqtyraq aıtqanda, 56 kelige deıingi salmaqta Іlııas Súleımenov birinshi bolyp quramaǵa altyn alyp kelse, eń úlken júldeni ekinshi bolyp Bekdáýlet Ibragımov ákelip berdi. 64 kelige deıingi salmaqtaǵy Bekdaýlet Ibragımov polıak Damıan Dýrkachtan fınalda basym tústi. Tóreshiler eshbir kúmánsiz jeńisti bizdiń boksshyǵa berdi.
69 kelige deıingi salmaqta sheshýshi saıysta qazaqstandyq boksshy Asylanbek Shymbergenov reseılik Sergeı Sobylınskımen kezdesti. Aıqas tóreshilerdiń bir aýyzdan sheshimimen Shymbergenovtyń jeńisimen aıaqtaldy. Buǵan deıin qazaqstandyq cheh boksshysy Zdenek Hladek pen Germanııanyń namysyn qorǵaǵan Magomed Şachıdovty jarys jolynan shyǵarǵan edi.
Al tórtinshi altyndy atalmysh týrnırde qurama úshin Anton Pınchýk (91 keli) alyp berdi. Ol fınalda Arslanbek Achılovtyń betin qaıtardy. Fınalǵa shyqqanymen Abaı Tólesh (75 keli) pen Ádilbek Nııazymbetov (81 keli) joǵarǵy júldege qol jetkize almaı, kúmis medaldi qanaǵat tutty. Al quramamyzdyń taǵy bir boksshysy Aıboldy Dáýrenuly (+91 keli) týrnırde qola medal ıelendi.
