Polshada qamalyp qalǵan qazaqstandyq júk kólikter Lıtva arqyly shyǵady

ASTANA. QazAqparat - Indýstrııa mınıstrligi Lıtvanyń quzyrly organymen Polshadaǵy qazaqstandyq júk kólikteriniń Baltyq eli arqyly ótý máselesine kelisti, dep habarlaıdy QazAqparat mınıstrliktiń baspasóz qyzmetine silteme jasap.

QR Indýstrııa jáne ınfraqurylymdyq damý mınıstrliginiń baspasóz qyzmeti Polsha Respýblıkasynyń aýmaǵynda turaqtap qalǵan otandyq júk kólikteriniń kedergisiz júrýin qamtamasyz etý úshin vedomstvo arnaıy sharalardy qolǵa alǵanyn habarlaıdy.

Bul rette osy jyldyń 21 aqpanynan bastap Polshanyń aýmaǵyna Eýropalyq odaqtan basqa barlyq eldiń júk kólikterine kirýge tyıym salynǵanyn aıta keteıik. Osy shekteýdiń saldarynan atalǵan memlekette 400-ge jýyq qazaqstandyq júk kóligi turyp qalǵan.

«QR Indýstrııa jáne ınfraqurylymdyq damý mınıstrligi qazaqstandyq tasymaldaýshylar qaýymdastyǵymen birlesip, júk kólikteriniń tizimin jasady. Bul otandyq júk tasymaldaýshylardyń jol júrisin qamtamasyz etý úshin qolǵa alynǵan shara. Sondaı-aq Varshava men Vılnıýstegi elimizdiń elshilikterimen jumylyp, atalǵan kólikterdiń shyǵyp ketýine ruqsat alý úshin polshalyq jáne lıtvalyq ýákiletti organdarmen kelissózder júrgizildi», dedi QR IIDM ókilderi.

Sonymen qatar 24 aqpanda vedomstvo Lıtva Respýblıkasynyń Kólik jáne kommýnıkatsııa mınıstrligimen Avtotasymaldaý máseleleri jónindegi aralas komıssııasynyń otyrysynda bas qosyp, onda Polshada aıaldap turǵan elimizdiń júk kólikteriniń Lıtva aýmaǵy arqyly ótý máselesi kelisildi. Buǵan qosa júk tasymalyn qamtamasyz etý úshin 2023 jylǵa arnalǵan ózara almastyrylatyn ruqsat blankilerine kvota belgilendi.

Qazir Lıtva tarapyna qazaqstandyq kólikterdiń tizimi berilip, bul júk tasymaldaýshylardyń kedergisiz júrip ótýin qamtamasyz etpek.