Polshada «Honda Civic» kóligi 22 adamdy qaǵyp ketken
ASTANA. QazAqparat - Jeksenbi kúni túnde Polshanyń kýrorttyq qalasy Sopotta «Honda Civic» júrgizýshisi jaıaý júrginshiler ótkelinde 22 adamdy qaǵyp ketti.
Wiadomosci.pl habarlaǵandaı, qatty jyldamdyqpen kele jatqan japondyq hetchbek kóliginiń júrgizýshisi 32 jastaǵy er adam róldi basqara almaı, jaıaý júrginshiler aımaǵyna shyǵyp ketken. Artynsha kólik aǵash ótkelge soǵylǵan.
Keıinnen polıtseıler habarlaǵandaı, oqıǵa oryn alǵan sátte «Honda» júrgizýshisi esirtki qabyldap alǵan bolyp shyqty. Qaıǵyly oqıǵa saldarynan 22 adam zardap shekti, olardyń kópshiligi aýyr jaraqattar aldy, aıaq-qoldary synǵandary da bar. Kýágerlerdiń aıtýynsha, apattan keıin júrgizýshi boı tasalaǵysy kelgen, alaıda kýágerler ony ustap qalyp, polıtseılerge tapsyrǵan. Oǵan endi 10 jylǵa deıin bas bostandyǵynan aıyrý jazasy kesilmek.
