Polshada 1987 jyly Qaırat Rysqulbekovke arnap marka shyǵarylǵan
ASTANA. QazAqparat - 1987 jyldyń shilde aıynda Polshadaǵy «Yntymaqtastyq» (Solıdarnost) astyrtyn uıymy Halyq qaharmany, Jeltoqsan oqıǵasynyń batyry Qaırat Rysqulbekovtiń qurmetine poshta markasyn shyǵarǵan.
Bul týraly elordada ótken Jeltoqsan oqıǵasynyń tarıhı jáne halyqaralyq mańyzyna arnalǵan halyqaralyq ǵylymı-praktıkalyq konferentsııada polıak ǵalymy, Azııany zertteý ınstıtýtynyń prezıdenti, PhD doktory Vladyslav Sokolovskıı aıtty, dep jazady «Egemen Qazaqstan».
Markada shalqasynan qulap jatqan er adamnyń beınesiniń ústinde «Q.Rysqulbekovke raqymshylyq jasalsyn. ALMA-ATA 18.06.1987» dep jazylǵan. Gorbachevtiń sýretiniń astynda «Ashyqtyq qaıda!?» degen suraq tur.
«Markanyń astyńǵy jaǵyndaǵy jazý polıak tilinen aýdarǵanda «Markany satýdan túsken tabys «Erkindik pen beıbitshilik» qozǵalysyna beriledi» degen jazý»,- dedi Vladyslav Sokolovskıı.
Varshavadan kelgen ǵalym Jeltoqsan oqıǵasy týraly 1986-87 jyldary Polshada elýden astam merzimdi basylymda jarııalanǵan materıaldarǵa sholý jasady.
Jeltoqsan oqıǵasynyń qaharmany Qaırat Noǵaıbaıuly Rysqulbekov 1986 jly 16-18 jeltoqsanda Almatydaǵy oqıǵaǵa belsene qatysqan jastardyń biri ekeni belgili. Q.Rysqulbekov sol jyldyń 1987 jylǵy 16 maýsymynda Qazaq KSR Joǵarǵy Sotynyń qylmystyq ister jónindegi kollegııasy úkimimen eń joǵarǵy jaza - ólim jazasyna kesilip, keıin atý jazasy 20 jylǵa bas bostandyǵynan aıyrý jazasymen aýystyrylǵan bolatyn. Alaıda, Q.Rysqulbekov túrmede qupııa jaǵdaıda qaza boldy. Qazaqstan egemendik alǵannan keıin ǵana Qaırat Rysqulbekov Qazaqstan Joǵarǵy Soty Plenýmynyń 1992 jyly 21 aqpandaǵy sheshimimen tolyqtaı aqtaldy. 1996 jylǵy 9 jeltoqsanda QR Prezıdenti N.Nazarbaevtyń Jarlyǵymen Q.N. Rysqulbekov qaıtys bolǵannan keıin Halyq Qaharmany ataǵymen, «Otan» ordenimen marapattalǵan.
Osy oraıda, Polshanyń «Yntymaqtastyq» uıymy týraly da az-kem aıta keteıik. Jumysy totalıtarlyq rejımge, kommýnıstik júıege qarsy baǵyttalǵan «Yntymaqtastyq» Polsha kásipodaqtary birlestiginiń qyzmeti 1989 jyldyń sáýirinde ǵana zańdastyrylǵan. Qazirgi tańda ol Polsha Respýblıkasynyń kásipodaǵy degen atpen jumysyn jalǵastyrýda. Uıymnyń negizin qalaǵan Leh Valensa 1983 jyly «Adam quqy úshin kúresker» retinde Beıbitshilik jónindegi Nobel syılyǵymen marapattalǵanyn atap ótý kerek.
