Polsha JOO-lary qazaqstandyqtarǵa oqý granttaryn usynady

ASTANA. QazAqparat - Polsha qazaqstandyqtarǵa bakalavrıat, magıstratýra jáne doktorantýra baǵdarlamalary boıynsha granttar usynady, dep habarlaıdy QazAqparat «Halyqaralyq baǵdarlamalar ortalyǵy» AQ-yna silteme jasaı otyryp.

Bilim granttary Polsha Úkimeti men Qazaqstan Úkimeti arasysyndaǵy bilim berý salasyndaǵy yntymaqtastyq týraly 2016 jylǵy kelisimge sáıkes júzege asyrylady. Bakalavrıat boıynsha - 3 oryn, magıstratýra -4 oryn jáne doktorantýra - 4 oryn bólinedi. Úmitkerler bilim alardan buryn polıak tilin bir jyl oqýy tıis.

Kelisim boıynsha stýdent tegin oqıdy, joǵary oqý ornynyń jataqhanasynda aqyly negizde tura alady (shamamen 80 - 150 eýro), doktorantýra baǵdarlamasynyń stýdentterine shákirtaqy (shamamen 300 eýro) taǵaıyndalady.

Fakýltetter men bilim berý mekemeleriniń tizimin nawa.gov.pl saıtynan bilýge bolady, sondaı-aq saýalnamaǵa qosymsha qujattar talap etiledi.

Úmitker Astanadaǵy «Halyqaralyq baǵdarlamalar ortalyǵy» AQ keńsesine kelip talap etiletin qujattar tizimi usynýy tıis. Alaıda sońǵy sheshimdi polıak tarapy qabyldaıdy.