Polsha Parlamentiniń spıkeri qyzmettik ushaqpen týystaryn tasymaldaǵany úshin qyzmetinen ketti
Juma, 9 tamyz kúni keshkisin Marek Kýhtsınskııdiń otstavkasynan soń Seım spıkeri laýazymyna Polsha ákimshiliginiń burynǵy ishki ister mınıstri Eljbeta Vıtek taǵaıyndaldy. Oǵan 245 depýtat daýys berdi.
Al Polshanyń Premer-Mınıstri Mateýsh Moravetskıı memlekettiń mańyzdy tulǵalaryn tasymaldaýdy uıymdastyrý týraly jańa zań ázirleý jóninde sheshim qabyldady. Bul týraly Mınıstrler keńesi tóraǵasynyń Keńse basshysy Mıhaıl Dvorık málim etti. Ol ushýlarǵa qatysty zańda kóp máselelerdiń naqtylanbaǵandyǵyn aıtty.
«Memlekettik mańyzdy tulǵalardyń ushaqpen ushý máselesi túrli quqyqtyq aktilermen rettelip kelgen. Al olar birneshe márte ózgeriske ushyraǵan»,-dedi Mıhaıl Dvorık.
Sonymen qatar ol zań jobasynyń negizgi mindetterine toqtaldy. ıAǵnı, premerdiń keńsesi reestr júrgizip, sheneýnik ushqannan keıingi birneshe kúnnen soń onyń qandaı maqsatpen qaıda ushqany jáne bortta qansha adam bolǵany jóninde aqparattar jarııalanady.
«Bul zań saıası kózqaras qaıshylyǵyna qaramastan daıyndalýy kerek»,-dedi Mıhaıl Dvorık.
«Biz sonymen qatar osy iske barlyq parlamenttik klýbtardy, ıaǵnı osy saıası partııalar atynan ókildik etetin azamattardy da tartamyz»,-dedi ol.
Zań jobasyn daıyndaıtyn saıasatkerlerdiń birinshi kezdesýi aldaǵy dúısenbide, 12 tamyz kúni ótedi.