Polsha men Qazaqstan arasyndaǵy taýar aınalymy ósti
ASTANA. QazAqparat - Qazaqstan men Polsha kólik-logıstıka, aýyl sharýashylyǵy, qurylys, ınfraqurylymdy damytý, tsıfrlyq ekonomıka salasyndaǵy yntymaqtastyqty damytady, dep habarlaıdy QazAqparat tilshisi.
Ótken jyly eki el arasyndaǵy taýar aınalymy kólemi 1 mıllıard dollarǵa deıin ósken.
«Bıylǵy jartyjyldyqta da eki el arasyndaǵy taýar aınalymynyń ósý qarqyny baıqaldy. Qazaqstan men Polsha qarym-qatynasy ózara tıimdi yntymaqtastyqqa negizdelgen. Bizdiń elimizde 200-ge jýyq polshalyq kompanııa jumys isteıdi. Polsha kásipkerleriniń Qazaqstanǵa quıǵan ınvestıtsııasy 200 mln dollarǵa jetti», - dedi QR Syrtqy ister mınıstriniń orynbasary Roman Vasılenko Qazaqstan-Polsha VIII úkimetaralyq otyrysynyń qorytyndysyna arnalǵan baspasóz máslıhatynda.
Vıtse-mınıstr Shymkenttegi Hımfarm zaýytyna 120 mln dollar ınvestıtsııalaǵan Polpharma kompanııasyn, qurǵaq qurylys qospalaryn shyǵaratyn Selena ujymyn erekshe atap ótti.
«Astanada ótip jatqan taý-ken kongresi, Qazaqstan-Polsha ekonomıkalyq forýmy, úkimetaralyq otyrys syndy sharalar aradaǵy saýda-ekonomıkalyq qarym-qatynastaryn nyǵaıtýǵa septigin tıgizedi. Qazaqstannyń ekonomıkalyq yntymaqtastyq elderi zamattary úshin engizgen vızasyz rejimi jáne Lot polish airlines áýe kompanııasynyń Astana-Varshava, Varshava-Astana tikeleı reısteri de yqpal etedi», - dep óz sózin túıindedi vıtse-mınıstr.
Óz kezeginde Polsha kásipkerlik jáne tehnologııalar mınıstriniń orynbasary Tadeýsh Kostsınskıı Qazaqstandaǵy Polsha kásipkerleriniń kóbeıetinine senim bildirdi.
«Qazaqstanda taý-ken resýrstary óte kóp jáne bul salada eleýli jańǵyrý jumystary júrip jatyr. Osy oraıda Polsha Qazaqstanǵa kómekteskisi keledi jáne taý-ken ónerkásibine arnalǵan zamanaýı mashınalaryn usynady», - dedi Tadeýsh Kostsınskıı.
