Polsha men Estonııada afrıkandyq dońyz obasynyń jańa oqıǵalary tirkelgen
ASTANA. QazAqparat - Polsha men Estonııa elderinde afrıkandyq dońyz obasynyń jańa jaǵdaılary tirkeldi. Bul týraly Belarýs Aýyl sharýashylyǵy jáne óndiris mınıstrliginiń veterınarlyq jáne azyq-túlikke qadaǵalaý júrgizý departamentine silteme jasaǵan BELTA habarlaıdy.
Halyqaralyq epızootıkalyq bıýrosynyń málimetterinshe, bul indettiń jańa oqıǵalary Polshadaǵy Podlıask voevodstvosynyń aýmaǵynda, sondaı-aq Estonııanyń Valgamaa jáne Ida-Vırýmaa ýezderinde tirkelgen.
Osyǵan baılanysty departament Belarýs aýmaǵynda Lıtvadan tiri shoshqalardy, bylǵary, múıizdi-tuıaqty jáne ishekten jasalǵan shıkizattardy, shoshqa qyltanyn, ańshylyq oljalaryn, janýarlardan, sonyń ishinde balyqtar men qustardan jasalǵan mal azyǵy men azyq qospalaryn, termııalyq óńdeýden (temperatýrasy plıýs 70 gradýstan tómen emes, óńdeý ýaqyty - 20 mınýttan az emes) ótkizilmegen mysyqtar men ıtterge arnalǵan azyq qospalaryn, sondaı-aq Polsha men Estonııadan shoshqalardy soıý jáne etin bólshekteý jabdyqtarynda bolǵan shıkizattyń kirgizilýine jol bermeý boıynsha qosymsha sharalardy qoldaný qajettiligi týraly aqparattandyrady.
Dońyz obasy oqıǵalary tirkelgen Podlıask voevodstvosy, Valgamaa jáne Ida-Vırýmaa ýezderine keletin bolsaq, bularda da osyndaı shekteýler kózdelgen.
Afrıkandyq dońyz obasy - sozylmaly túrde ótetin jáne kóbinese ólimge soqtyratyn juqpaly vırýstyq aýrý. Bul indetke jas shamasyna jáne tuqymyna qaramastan, jabaıy jáne úı shoshqalary ushyraıdy. Bul aýrýǵa qarsy vaktsına joq. Aýrýǵa shaldyqqan shoshqalardyń barlyǵy derlik joıylady. Afrıkandyq dońyz obasynyń adam úshin qaýpi joq.
