Polsha men Aqmola oblysy yntymaqtastyqty nyǵaıtpaq
KÓKShETAÝ. QazAqparat - Aqmola oblysy ákiminiń orynbasary Ashat Qaınarbekov Polsha Respýblıkasynyń Nıjnesılezskıı aımaǵynan kelgen delegatsııany qabyldady, dep habarlaıdy «QazAqparat» HAA tilshisi.
Aqmola oblystyq kásipkerlik jáne ónerkásip basqarmasy baspasóz qyzmetiniń málimeti boıynsha, Polshanyń ekonomıkalyq damý agenttiginiń basshysy Marıýsh Sınor bastap kelgen mártebeli meımandarmen ekijaqty yntymaqtastyq jáne saýda-ekonomıkalyq baılanystardy odan ári damytý múmkindikteri qarastyryldy.
Kezdesýde Marıýsh Sınor Nıjnıı Sılezıı aımaǵynda mashına jasaý ónerkásibi, ınnovatsııalyq tehnologııalardy jasaý qarqyndy damyp kele jatqanyn atap ótti. Oǵan qosa, tarıhı sáýlet eskertkishterimen tanymal óńirde týrızm salasyna da zor kóńil bólinetinin alǵa tartty.
Sondaı-aq, Ashat Qaınarbekov búgingi tańda oblys aýmaǵynda polshalyqtarmen tyǵyz áriptestik qatynas ornatqan «Ormıs-Stroı» jáne «Blıýz» (kosmetıkalyq ónimder shyǵarady) jaýapkershiligi shekteýli seriktestikteri jumys isteıtinin aıta kele, Aqmola óńirinde agrarly sala men qatar óndiris salasy joǵary qarqynmen damyp kele jatqanyn atap ótti.
Kezdesýde taraptar ekijaqty áriptestik qatynasty damytýǵa ázir ekendikterin jetkizdi.
Budan keıin polshalyq qonaqtar «Aqmola oblysy polıaktarynyń birlestigi» qoǵamdyq birlestiginiń músheleri jáne «Qazaqstandyq argo ınnovatsııalyq korporatsııasy» jaýapkershiligi shekteýli seriktestiginiń ujymymen kezdesti.
