Polsha Qazaqstan jastaryna beriletin bilim granttary sanyn arttyrmaq
ASTANA. QazAqparat - Qazaqstanyń 800 stýdenti Polshada bilim alyp jatyr. Bul týraly Astanada ótken baspasóz máslıhatynda Qazaqstannyń Polshadaǵy Tótenshe jáne Ókiletti Elshisi Marǵulan Baımuhan málim etti, dep habarlaıdy QazAqparat.
«Eki eldiń arasynda mádenıet jáne bilim berý salalaryna erekshe ekpin qoıylýda. Búginde Qazaqstannan Polsha joǵary oqý oryndarynda 800-ge jýyq stýdent bilim alyp jatyr. Jalpy, polshalyq oqý oryndarynyń beretin bilimine suranys bar, ıaǵnı onda eýropalyq sapa bar jáne oqý baǵasy da qoljetimdi», - dedi M. Baımuhan.
Osy oraıda ol eki aı buryn Qazaqstan JOO-lary rektorlarynyń Polshaǵa sapary uıymdastyrylǵanyn eske saldy.
«Bul sapar aıasynda Polsha rektorlary konferentsııasymen kelisimge qol qoıdyq. Búginde bizde joǵary oqý oryndary arasynda 100-ge tarta kelisimder bar. Oǵan qosa, Qazaqstan stýdentteri úshin polıak tarapy granttar sanyn arttyrý úshin kelissózderdi jalǵastyramyz. Bul turǵyda granttar sanyn bizdiń stýdentterge 50-ge deıin arttyrýdy usyndyq, onyń ishinde aǵylshyn tilinde oqytý tártibin de eskerdik. Búginde kelisimde tek 11 ǵana grant bar», - dedi Elshi.
Budan buryn habarlanǵandaı, Polsha qazaqstandyqtarǵa bakalavrıat, magıstratýra jáne doktorantýra baǵdarlamalary boıynsha granttar usynady.
