Polsha Qazaqstan arqyly ótetin kólik dálizin belsendi paıdalanýǵa nıetti
ASTANA. QazAqparat - Búgin QR Investıtsııalar jáne damý mınıstri Jeńis Qasymbek pen Polshanyń Qazaqstandaǵy elshisi Selım Hazbıevıchpen kezdesti. Bul týraly QazAqparat mınıstrliktiń baspasóz qyzmetine silteme jasap habarlaıdy.
Kezdesý barysynda taraptar ınvestıtsııa, kólik jáne logıstıka, azamattyq avıatsııa, ınnovatsııa jáne tehnologııa salalaryndaǵy yntymaqtastyqty arttyrý týraly sóz etti.
«Biz Polshany Eýropadaǵy eń mańyzdy saıası jáne ekonomıkalyq seriktes el retinde sanaımyz. Búginde eki el arasyndaǵy qatynas jan-jaqty damyp, jańa beleske kóterildi. Búgingi kezdesý - eki el arasyndaǵy saýda-ekonomıkalyq baılanysty odan ári nyǵaıtýdyń, ózara múddeli salalarda yntymaqtastyqty arttyrýdyń taǵy bir kýási», - dedi mınıstr Jeńis Qasymbek.
Polsha elshisi Selım Hazbıevıch eki el arasyndaǵy saýda-ekonomıkalyq, ınvestıtsııa, tranzıttik júk tasymaly sııaqty baǵyttardaǵy baılanysty nyǵaıtyp, Qazaqstan arqyly ótetin eýrazııalyq kólik dálizin belsendi paıdalanýǵa nıetti ekenin aıtty.
2017 jyly Polshadan Qytaıǵa Qazaqstan arqyly 46,1 myń konteıner (jıyrma fýttyq ekvıvalenttegi) ótken (490 konteınerlik poıyz), bul 2016 jylmen salystyrǵanda 2 esege kóp (268 konteınerlik poıyz).
2018 jyldyń qańtar aıynda QHR-Polsha-QHR baǵytymen 4563 konteıner (JFE) ótken (55 konteınerlik poıyz), bul 2017 jyldyń sáıkes merzimimen salystyrǵanda 33,9%-ǵa artyq (3406 konteıner - JFE).
Eki el arasyndaǵy qatynastyń artýyna «LOT Polish Airlines» polıak áýekompanııasy júrgizetin «Varshava-Astana-Varshava» tikeleı reısi kóp septigin tıgizdi (2017 jyldyń 30 mamyrynan bastap aptasyna 4 reıs).
2017 jyly Qazaqstan men Polsha arasyndaǵy taýar aınalymy shamamen 1 mlrd AQSh dollaryn qurady (naqtyraq 902,1 mln AQSh dollary) jáne bul kórsetkish 2016 jylmen salystyrǵanda 15,2%-ǵa ósti (783,2 mln. AQSh dollary).
Qazaqstannan Polshaǵa jóneltilgen eksport kólemi 575,2 mln AQSh dollaryn qurady, bul 2016 jylmen salystyrǵanda 8,8%-ǵa artyq (528,7 mln AQSh dollary).
Foto: eurasia.expert
