Polsha Kaspııdegi qazaqstandyq portty paıdalana alady - Nursultan Nazarbaev
VARShAVA. QazAqparat - Polsha Kaspııdegi qazaqstandyq portty paıdalana alady. Bul týraly Elbasy Nursultan Nazarbaev Polsha Prezıdenti Andjeı Dýdamen ekijaqty kelissóz qorytyndysy boıynsha birlesken málimdemede málim etti.
«Qazaqstan biz aıtqan polshalyq teńiz porttary jáne termınaldaryn paıdalanýǵa daıyn. Sondaı-aq, Polshanyń da Kaspıı teńizindegi qazaqstandyq porttardy paıdalanýyna múmkindigi bar»,-dep atap ótti Elbasy.
«Búgin men Prezıdent myrzaǵa yntymaqtastyqtyń jáne eksporttyń múmkindigi jaıly aıttym. Bizdiń Gdanskidegi port Qazaqstan munaıyn qabyldaýǵa daıyn»,-dedi óz kezeginde Andjeı Dýda.
Memleket basshysy sondaı-aq aýyl sharýashylyǵy salasynda yqpaldastyqtyń múmkindikterine toqtaldy. «Bizde aýyl sharýashylyǵyn damytýdyń úlken áleýeti bar. Polsha - aýylsharýashylyq ónimderin sapaly óńdeýmen shuǵyldanatyn elderdiń biri. Bul bizge qajet. Qazaqstanda 220 mıllıon gektar aýyl sharýashylyǵy jeri bar. Onyń 25 mıllıony egin egýge paıdalanylady. Bul ónimderdiń barlyǵyn óńdeý qajet»,-dep túsindirdi Prezıdent.
«Qoryta aıtqanda»,- dedi Nursultan Nazarbaev, «Qazaqstanda jáne Polshada ár salada yntymaqtastyqty jolǵa qoıýǵa áleýet jeterlik».
Elbasynyń aıtýynsha, erteń Prezıdent Polsha Premer-Mınıstri Beate Shydlomen de ekijaqty qarym-qatynastyń naqty máselelerin talqylaıdy.
«Meniń Polshaǵa saparym bizdiń elderimiz úshin tabysty bolatyndyǵyna senemin»,-dep sózin qorytty Nursultan Nazarbaev.
