Polsha bıligi qundyzdar sanaǵyn júrgizbek
ASTANA. QazAqparat - Polshanyń Qorshaǵan ortany qorǵaý mınıstrligi jaqyn aradaǵy eki jyl ishinde el aýmaǵyn mekendep jatqan qundyzdardyń jalpyulttyq sanaǵyn júrgizýge nıetti, dep habarlaıdy ITAR-TASS.
Osy sanaq nátıjeleri boıynsha arnaıy karta qurylady, onda osy janýarlardyń adamǵa keltirip jatqan zııanynyń aýqymdylyǵy jóninde maǵlumat alýǵa múmkindik týady. Sonyń negizinde qundyzdardyń bolashaq taǵdyry sheshilmek.
Aıta keteıik, Polsha jerindegi ormanshylar men ańshylar birneshe jyldan beri jergilikti bılik ókilderine qundyzdar sanynyń jyldan-jylǵa kóbeıip bara jatqanyn aıtyp shaǵymdanyp keledi. Olar balyq toǵandaryndaǵy, sý basqan alqaptar men orman alańdaryndaǵy saldardy buzýmen zalal keltirip jatyr. "Burynyraqta bul janýarlar basqa aımaqtarǵa qonystandyrylatyn, al qazir tipti, olardy qonys aýdartatyn jer de qalmaǵan", - deıdi mamandar. Eldiń Qorshaǵan ortany qorǵaý mınıstrliginiń baspasóz qyzmetiniń ókili habarlaǵandaı, mundaı sanaq atalmysh janýarlardy tıisinshe qorǵaýǵa alyp, bıologııalyq san alýandyqty saqtaýǵa qatysty máselelerde halyqaralyq mindettemelerdi oryndaý úshin qajet.
Qundyzdar Polshanyń ásirese shyǵys bóliginde - Podlıasede tym kóp shoǵyrlanǵan, sońǵy málimetterge súıensek, munda osy túrdiń shamamen 15 myń ókili mekendeıdi. Sondaı-aq ótken jyly Podlıaseniń qorshaǵan ortany qorǵaý jónindegi Aımaqtyq dırektsııasy osy janýarlardan zardap shegýshilerge 2,3 mln. polıak zlotyıy kóleminde ótemaqy tólegen.
