Polsha baıqaýshysy: Qazaqstan saılaý arqyly saıasattaǵy tyń baǵdarlarǵa izdeý salyp jatyr

NUR-SULTAN. QazAqparat - Polsha Respýblıkasy Seıminiń eks-depýtaty, halyqaralyq baıqaýshy Tadýesh Ivınskıı Qazaqstanda ótip jatqan prezıdenttik saılaý protsesine qatysty pikirin bildirdi, dep habarlaıdy QazAqparat tilshisi.

«Sońǵy 25 jylda Qazaqstanǵa on úsh márte jolym túsipti. Ár jyldary Polsha Respýblıkasynyń Seıminiń depýtaty, keıde Eýropa keńesiniń parlamenttik assambleıasy (EKPA) tóraǵasynyń orynbasary, Úkimet múshesi de retinde keldim. Qazaqstandaǵy qazirgi saılaý protsesine ǵylym adamy, saıasatker retinde úlken qyzyǵýshylyqpen qaraımyn. Sebebi, meniń oıymsha, qazirgi tańda Qazaqstanda turaqtylyq protsesin rettep otyrýǵa arnalǵan qyzyqty tájirıbe júrip jatyr», - dedi saıasatker elordada halyqaralyq baıqaýshylardyń baspasóz máslıhatynda.

Polsha Seıminiń eks-depýtaty óz sózinde Qazaqstan kezekten tys prezıdenttik saılaýdy ótkizýdiń arqasynda «saıası zilzaladan» saqtanyp otyrǵanyn atap ótti. Saıasatker óz sózinde bıliktiń aýysýy jaǵynan osy ýaqytqa deıin Ortalyq Azııa elderiniń keıbiriniń aýzy kúıip te úlgergenin jetkizdi.

«Nursultan Nazarbaevtyń memleket qurylymy týraly sóz qozǵaǵanda Lı Kýn ıÝdyń basshylyǵyndaǵy Sıngapýrdy tilge tıek etip otyrǵanyn birneshe márte estigenim bar. Osy maqsatqa jetý jolynda bul elde bııazy protsester júrip jatqanyna kýá bolyp otyrmyz», - dedi ol.

Tadýesh Ivınskıı óz sózinde Qazaqstannyń shaǵyn bóligi Eýropamen shektesip jatqanyn, mine sondyqtan Qazaqstannyń eýrazııalyq memleket sanalatynyn jetkizdi.

«Qazaqstan EKPA, Eýropa keńesiniń múshesi bola alady. Eýropa keńesiniń quramynda 47 el bar. Ol eń aldymen adam quqyǵy úshin jumys júrgizedi, 200-ge tarta halyqaralyq konventsııasy bar. Túrkııanyń, máselen, jeriniń 3 paıyzy ǵana Eýropa aýmaǵynda jatsa da, EKPA múshesi sanalady. Biraq, bul máseleni aınalyp kelgende Qazaqstan bıligi sheshedi. Qazaqstannyń qazirgi saılaýyndaǵy kandıdattardyń qaı-qaısysy da osal emestigin bilemin. Meniń oıymsha, Qazaqstan saılaý arqyly saıasattaǵy tyń baǵdarlarǵa izdeý salyp jatyr», - dedi Tadýesh Ivınskıı

Eske sala ketsek, búgin Qazaqstan Prezıdentin kezekten tys saılaý bastaldy. QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi.

Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.