Polsha áýejaıynda qazaqtyń kúıi oryndaldy
Frıderık Shopen atyndaǵy áýejaıda dombyra, qobyz jáne jetigen bir ýaqytta kúıden shashý shashty. Shara QR Tuńǵysh Prezıdenti kúni merekesine oraılastyrylǵan.
Erekshe áýendi estigisi kelgen jolaýshylar kóptep jınaldy. Keıin áýezdi mýzykanyń yrǵaǵymen birge bı bılep, máz-meıram boldy. Jekelegen kórermender sharany smartfondaryna túsirip, qyzyqty qoıylym úshin rızashylyqtaryn bildirdi.
Polsha áýejaıyndaǵy kontsertti Júrgenov atyndaǵy ulttyq óner akademııasynyń mýzykanttary qoıdy. Bul olardyń Qazaqstannyń Tuńǵysh Prezıdenti kúnine oraı sheteldikterge jasaǵan tosynsyıy boldy.
«Mundaı qoıylymdy alǵash ret kórip otyrmyn. Adamdardyń bári rıza. Óıtkeni Uly dala mýzykasy Varshavanyń ortalyǵynda oınaldy. Ózim mýzykaǵa jaqyn adammyn. Sondyqtan osynda shyrqalǵan án-kúı de, bılengen bı de óte keremet boldy. Úlken rahmet», - dedi Leonıd esimdi jolaýshy.
«Maǵan mýzyka men bı óte qatty unady. Sizdiń eldiń mádenıeti men mýzykasy ádemi. Qazaqstanda bolǵan emespin. Biraq ondaı múmkindik týyp jatsa, qýana-qýana baramyn. Astananyń sýretterin kórgen edim, shahar birden unady», - deıdi kórermen bolǵan áýejaıdyń taǵy bir jolaýshysy Hanna.
