Pol Makkartnı Devıd Bekhemdi quramaǵa qospaǵan aǵylshyn jattyqtyrýshylaryn «esýas» dep atady
ASTANA. 25 shilde. QazAqparat - Londondaǵy HHH Olımpıadalyq oıyndardyń ashylý saltanatynda óner kórsetetin Pol Makkartnı fýtboldan Anglııa quramasynyń jattyqtyrýshylaryn ataqty fýtbolshy Devıd Bekhemdi quramaǵa qospaǵandary úshin «esýas» dep atady.
The Sun aqparaty boıynsha, Stuart Pearce komandasynyń jattyqtyrýshysy Bekhemdi olımpıadalyq qurama qatarynan shyǵaryp tastaǵan. «Ol - ult batyry. Fýtbol men olımpıadalyq quramaǵa sińirgen eńbegi úshin Bekhem quramadaǵy birinshi oıynshy bolýy kerek edi, alaıda qaıdaǵy bir esýas basqasha sheshim qabyldapty» , - dedi Makkartnı. Quramanyń bas jattyqtyrýshysy Stıýart Pırs óz sheshimin Bekhem - Anglııa quramasy úshin aıtarlyqtaı jaqsy oıynshy emes dep túsindirgen. «Jattyqtyrýshy sheshimine Pol Makkartnıdiń sózi esh áser etpeıdi. Tipti Ulybrıtanııa hanshaıymy men ózge de Gollıvýd juldyzdary Bekhemdi jaqtap sóılese de, sheshim ózgertilmeıdi», - dep málimdedi aǵylshyn quramasynyń baspasóz qyzmeti.
Aıta keteıik, quramaǵa kirmegendigi jaıly jańalyq Bekhemniń kóńil-kúıin túsirgen. LA Galaxy klýbynyń juldyzy Londonnyń shyǵysyndaǵy Stratfordta Olımpıada oıyndarynyń ashylý saltanatyna qatysatyndyǵyn málim etti, dep habarlaıdy Eýrazııa birinshi arnasy.
