Pol Makkartnı dúnıejúzindegi eń baı mýzykanttar arasynda úshinshi orynǵa shyqty
ASTANA. KAZINFORM — Aty ańyzǵa aınalǵan ulybrıtanııalyq The Beatles tobynyń burynǵy múshesi Pol Makkartnı dúnıejúzindegi eń baı mýzykanttardyń úshtigine endi.
Forbes jýrnalynyń baǵalaýynsha, 84 jastaǵy Makkartnıdiń baılyǵy 1,4 mlrd dollarǵa (shamamen 625 mlrd teńge) jetken. Osy kórsetkish boıynsha ol mýzyka ındýstrııasyndaǵy eń aýqatty adamdar reıtınginde úshinshi orynǵa turaqtady.
Odan joǵary satyda 2,8 mlrd dollar baılyǵymen reper Jay-Z jáne 2 mlrd dollar aktıvi bar pop-ánshi Teılor Svıft tur.
Mýzykant baılyǵynyń negizgi bóligi — avtorlyq quqyqtan, mýzykalyq katalogtardan, kontserttik týrlerden túsetin tabys, sondaı-aq jyljymaıtyn múlik pen óner týyndylaryna salǵan ınvestıtsııalary.
Onyń tabys kózderiniń biri — Makkartnı 1969 jyly qurǵan MPL Communications baspa kompanııasy. Bul kompanııa mýzykanttyń óz shyǵarmalaryna jáne basqa avtorlardyń ánder katalogyna qatysty quqyqtardy basqarady.
Makkartnı tanymal ánderdiń avtorlyq quqyǵyn satyp alý tabysty bızneske aınalmaı turyp-aq, mýzyka murasyna ınvestıtsııa sala bastaǵan. Onyń qorjynynda rok-n-rolldyń negizin qalaýshylardyń biri Baddı Hollıdiń ánderi, Brodveı mıýzıklderiniń shyǵarmalary jáne tanymal rojdestvolyq hıtter bar.
Makkartnı The Beatles tobynyń holdıngtik kompanııasy Apple Corps arqyly da tabys tabady. Kompanııa strımıng platformalary, vınıl plastınkalar men kádesyı ónimderin satý esebinen jylyna shamamen 50 mln dollar tabys tabady. Makkartnıdiń ózi, Rıngo Starr, sondaı-aq Djon Lennon men Djordj Harrısonnyń muragerleri kompanııa kirisiniń tórtten bir bóligin alady.
Buǵan qosa, The Beatles ánderinen túsetin avtorlyq syıaqy Makkartnıge jyl saıyn shamamen 10 mln dollar ákeledi. Onyń baılyǵynyń artýyna álemdik gastroldik týrlary da eleýli úles qosqan. Atap aıtqanda, 2022–2025 jyldary ótken Got Back týri aıasynda 79 kontsert uıymdastyryldy.
Mýzykanttyń ózge aktıvteriniń qatarynda Ulybrıtanııa men AQSh-taǵy jyljymaıtyn múlki, sondaı-aq Pablo Pıkasso men Rene Magrıtt kartınalaryn qamtıtyn óner týyndylarynyń kollektsııasy bar.
Pol Makkartnı The Beatles tobynyń quramynda álemge tanyldy. Ujymda onymen birge Djon Lennon, Djordj Harrıson jáne Rıngo Starr óner kórsetti. Toptyń Please Please Me atty debıýttik albomy 1963 jyly jaryq kórip, «bıtlomanııa» dáýiriniń bastalýyna negiz bolǵan mańyzdy oqıǵalardyń birine aınaldy.
Keıin The Beatles mýzyka tarıhyndaǵy eń kóp albom satqan top atandy. Olardyń jazbalarynyń álemdik satylymy 600 mıllıon danadan asqan. Top shyǵarmashylyq jolynda segiz «Gremmı», tórt Brit Awards, «Oskar» jáne 14 Aıvor Novello syılyǵyn ıelendi.
1970 jyly top taraǵannan keıin Makkartnı jeke shyǵarmashylyq jolyn bastap, alǵashqy jeke albomyn shyǵardy. Keıin ol jubaıy Lında Makkartnı jáne mýzykant Dennı Leınmen birge Wings tobyn qurdy.
Eske salaıyq, buǵan deıin Ilon Mask baılyǵy 600 mıllıard dollardan asqan alǵashqy adam bolǵanyn jazǵan edik.
