Pogondaǵy ákeler: ulandyqtar balalaryn qalaı tárbıeleıdi
ASTANA. KAZINFORM — Maýsymnyń úshinshi jeksenbisinde Qazaqstanda er adamnyń otbasyndaǵy, balalardy tárbıeleýdegi jáne dástúrli qundylyqtardy nyǵaıtýdaǵy mańyzdy rólin kórsetetin mereke — Ákeler kúni atap ótiledi.
QR ІІM Ulttyq ulanynyń áskerı qyzmetshileri úshin bul kún erekshe mańyzǵa ıe, óıtkeni olar kún saıyn tek Otannyń ǵana emes, óz otbasylarynyń da qorǵaýshysy bolyp keledi.
Búginde Ulttyq ulan qatarynda 1700-den astam kópbalaly otbasy bar. Solardyń biri — 5573 áskerı bólimi komandıriniń tehnıka jáne qarý-jaraq jónindegi orynbasary podpolkovnık Ádilbek Bolathanovtyń otbasy.
Ofıtser quqyqtyq tártip áskeriniń sapynda 20 jylǵa jýyq eńbek etip keledi. Osy ýaqyt ishinde ol Qazaqstannyń tórt qalasynda qyzmet atqarǵan. Shańyraq ıesi osyǵan baılanysty otbasymen birge turǵylyqty jerin birneshe ret ózgertti. Áskerı qyzmettiń qonys aýdarýy men erekshelikterinde kezdesken barlyq qıyndyqtarǵa qaramastan, jubaıy senimdi serik bop, joldasyn árdaıym qoldaı bildi jáne úıdegi jaılylyqty qamtamasyz etti. Ózara túsinistik pen otbasynyń qoldaýy ofıtserdiń Otanǵa qaltqysyz qyzmet etýine múmkindik berdi.
Áskerı qyzmet joǵary jaýapkershilikti jánk tártipti talap etedi, desek te keıimkerimiz bala tárbıesiniń mańyzdy mindet bolyp qala beretinine senimdi.
— Áke bolý — úlken jaýapkershilik. Biz balalarymyzdyń bizge qarap boı túzegenin qalaımyz, olar úshin úlgi bolýǵa tyrysamyz. Áskerı qyzmet maǵan tártip pen tabandylyqty, al áke bolý — meıirimdilik pen shydamdylyqty úıretti, — deıdi podpolkovnık Ádilbek Bolathanov.
6636 áskerı bóliminiń serjanty Mahambet Baıjigitov otbasyna jáne qyzmettik boryshyna adaldyqtyń taǵy bir mysaly. Áriptesteriniń arasynda ol baılanys mamany jáne jaýapty áskerı qyzmetshi retinde laıyqty qurmetke ıe. Jubaıymen birge jeti bala tárbıelep, otbasynyń amandyǵyn, uldary men qyzdarynyń jetistikterin ómirdegi basty jeńisim dep sanaıdy.
Kópbalaly áke balalardy sport arqyly tárbıeleýge erekshe kóńil bóledi. Qyzmetten bos ýaqytynda ol uldaryn qazaq kúresi boıynsha jattyqtyrady. Perzentterine ulttyq dástúrlerge degen súıispenshilikti, tártipti, qarsylasyn qurmetteýdi jáne jeńisjolynda jigerli bolýdy úıretedi. Serjanttyń aıtýynsha, sportpen shuǵyldaný balalarǵa minez-qulyq pen ózine degen senimdilikti qalyptastyrýǵa kómektesedi.
Ulttyq ulannyń áskerı qyzmetshileri memlekettiń senimdi tiregi bola otyryp, óskeleń urpaqtyń boıynda patrıotızm sezimin, eńbekke degen qurmet pen otbasylyq qundylyqtarǵa adaldyqty tárbıeleıtin qamqor áke bolyp qala beredi.
Buǵan deıin keshe elordada Astana qalasy ákimdiginiń qoldaýymen «Jaýapty áke — turaqty qoǵamnyń tiregi» atty qalalyq Ákeler forýmy ótkenin jazǵanbyz.
