Pogon men kásipqoı rıng: sportshy kýrsanttyń quqyqtyq mártebesi qandaı
ASTANA. KAZINFORM – ІІM Qaraǵandy akademııasynyń kýrsanty, polıtsııa serjanty Baýyrjan Álıdiń kásipqoı bokstaǵy jetistigi sportshynyń mansabyna qatysty birqatar quqyqtyq máseleni de alǵa shyǵardy. Osyǵan oraı boksshynyń bapkeri Qazaqstannyń eńbek sińirgen jattyqtyrýshysy Ádil Qarıden kýrsanttardyń kásipqoı sporttaǵy múmkindikteri, jarystarǵa qatysý tártibi men qarjylandyrý tetikteri jaıynda surap bilgen edik.
– ІІM akademııasynyń kýrsanty kásipqoı rıngte óner kórsetýge quqyly ma? Zań boıynsha oǵan vedomstvo tarapynan qandaı qoldaý kórsetilýi múmkin?
– Iá, onyń sportpen aınalysýǵa tolyq quqyǵy bar. Sebebi «Quqyq qorǵaý qyzmeti týraly» Qazaqstan Respýblıkasynyń zańyna sáıkes, joǵary deńgeıdegi dene daıyndyǵy – qyzmettik mindetterdiń biri. Kýrsanttar olımpıadalyq sport túrlerin damytýǵa, týrnırlerge qatysýǵa jáne memlekettik nagradalar alýǵa quqyly.
Alaıda zańnamaǵa sáıkes, kýrsant mártebesinde júrgen kezde oǵan vedomstvo tarapynan syıaqy, jol qarajaty nemese issapar shyǵyndary tólenbeıdi. Mundaı tólemdermen tolyqqandy qamtamasyz etý akademııany bitirip, resmı túrde qyzmetker mártebesin alǵannan keıin ǵana múmkin bolady. Zań talaptary qazirgi ýaqytta osyndaı.
– Kýrsanttyń respýblıkalyq jáne halyqaralyq jarystarǵa, oqý-jattyǵý jıyndaryna qatysýy úshin qyzmettik ruqsat alý tártibi qalaı júzege asyrylady?
– Akademııa mundaı ruqsatty óz betinshe bere almaıdy. Respýblıkalyq jáne halyqaralyq deńgeıdegi jarystarǵa qatysý máselesin Іshki ister mınıstrliginiń basshylyǵy kelisedi. Mınıstrliktiń resmı maquldaýynan keıin ǵana vedomstvo kýrsantty Jambyl oblysynyń Polıtsııa departamentine qarasty «Arlan» sport klýbyna usynady.
Osy qyzmettik kelisý tártibinen ótkennen keıin ǵana kýrsanttyń jarysqa qatysýyna zańdy múmkindik beriledi.
– Eger vedomstvonyń zań boıynsha kýrsantqa tikeleı aqsha tóleýine múmkindik bolmasa, onda onyń jol shyǵyndary, oqý-jattyǵý jıyndary men daıyndyǵy qalaı qarjylandyrylady?
– Kýrsantqa vedomstvolyq tólemder zańda qarastyrylmaǵandyqtan, olımpıadalyq sport túrin damytýǵa baılanysty jol jáne uıymdastyrý shyǵyndaryn Qazaqstan boks federatsııasy óz moınyna alady. Biraq, federatsııa qarajatty «Arlan» sport klýby arqyly bóledi.
Bul tetik sybaılas jemqorlyqqa qarsy zańnama talaptaryn tolyqtaı saqtaýǵa múmkindik beredi. Kýrsant kommertsııalyq qarajatty tikeleı almaıdy, al federatsııa ІІM maquldaǵan vedomstvolyq sport klýby arqyly barlyq qajetti shyǵyndardy óteıdi.
– Bul jaǵdaı zańnamaǵa ózgerister engizý qajettigin kórsetpeı me?
– Iá, bul jaǵdaı vedomstvolyq sport júıesin reformalaý qajettigin anyq kórsetip otyr. Zańnamalyq deńgeıde «sportshy-kýrsant» jáne «sportshy-polıtseı» degen naqty quqyqtyq mártebelerdi bekitý qajet.
Pogon taqqan, sportta erekshe qabileti bar jastarǵa erte kezeńnen bastap memlekettik qoldaý men qarjylandyrý alýǵa múmkindik berilýi tıis. Sonda olar kúrdeli quqyqtyq kedergilerge tap bolmaı, Qazaqstannyń týyn álemdik arenada abyroımen kótere alady.
Aıta keteıik, bokstan Qazaqstannyń sport sheberi, kadetter men jastar arasyndaǵy eki dúrkin el chempıony, Azııanyń qola júldegeri jáne halyqaralyq týrnırlerdiń jeńimpazy Álı Baýyrjan kásipqoı boksta qarsylasyn 57 sekýndta nokaýtqa túsirgen edi.
