«Podstepnoe-Fedorovka» jolyn jóndeýge bıýdjetten 6 mıllıard teńge bólindi

NUR-SULTAN. QazAqparat – QR Indýstrııa jáne ınfraqurylymdyq damý mınıstri Qaıyrbek Óskenbaev jol qurylystarynyń qalaı qarjylandyrylatynyn aıtyp berdi, dep habarlaıdy QazAqparat tilshisi.

«Memleket basshysynyń tapsyrmasyna sáıkes bıyl «Beıneý – Shalqar – Yrǵyz» avtojolynyń qurylysyna tehnıkalyq ekonomıkalyq negizdeme ázirleýdi josparlap otyrmyz. «Podstepnoe-Fedorovka» jobasyn iske asyrý úshin bıyl respýblıkalyq bıýdjetten 2 ýchaskege 6 mıllıard teńge bólindi. Qalǵan 2 ýchaskege batys óńirdiń «Qarashyǵanaq Petroleým Opereıtıng» áleýmettik ınfraqurylymdyq jobalary aıasynda qarajat tartý josparlanýda», - dedi Q. Óskenbaev Úkimet otyrysynda.

Búgingi tańda Ulttyq ekonomıka, Energetıka mınıstrlikterimen jáne oblys ákimdigimen birlesip joldyń eki ýchaskesin qarjylandyrý úshin «Qarashyǵanaq Petroleým Opereıtıng» mindettemelerin qaıta qaraý jumysy júrgizilýde.

«Jezqazǵan-Qaraǵandy jáne Semeı-Óskemen jobalary boıynsha qarjylandyrý kózderiniń túrli nusqalary qarastyrylyp jatyr. Jobalyq-smetalyq qujattama ázirleýdi kezeń-kezeńimen 2022-2023 jyldarǵa aıaqtaý josparlanǵan», - dedi Indýstrııa mınıstri.

Buǵan deıin Indýstrııa mınıstri avtojol salasyndaǵy jobalardy iske asyrýǵa bıylǵy bıýdjetten 601 mıllıard teńge bólingenin aıtqan edi.

Al 2025 jylǵa deıin respýblıkalyq joldardyń normatıvtik jaǵdaıdaǵy úlesi 100 paıyzǵa jetedi.

Sonymen birge, eldegi kólik-tranzıttik áleýetin arttyrý úshin Qazaqstan arqyly ótetin 8 kólik dálizi jańǵyrtylady.