Podstepnoe – Fedorovka – RF shekarasy ýchaskesindegi jol aıryǵy ýaqytsha jabyldy

ASTANA. KAZINFORM – Búginnen bastap Podstepnoe – Fedorovka – RF shekarasy avtojoly ýchaskesindegi jol aıryǵynyń qurylysyna baılanysty qozǵalysqa ýaqytsha shekteý engiziledi.

— Bıyl respýblıkalyq mańyzy bar Podstepnoe — Fedorovka — RF shekarasy (Aqsaı ó/p) avtomobıl jolynyń 0-36 shaqyrym aralyǵyndaǵy ýchaskesinde qaıta jańartý jobasy boıynsha jumystar qarqyndy bastaldy.

Joba aıasynda Podstepnoe eldi mekeni men áýejaıdy aınalyp ótetin 15 shaqyrymdyq jol ýchaskesin salý qarastyrylǵan. Atalmysh joldyń 266 shaqyrymynda Aqtóbe — Oral avtojolymen janasatyn «bede japyraǵy» ádisimen kólik aıryǵyn soǵý josparlanǵan, - dep jazdy QazAvtoJoldan.

Kólik aıryǵynyń ýchaskesinde negizgi jumystardyń bastalýyna oraı merdiger tarapynan 2025 jylǵy 13 maýsymnan bastap osy aralyqta qozǵalysqa ýaqytsha shekteý engiziledi. Balama aınalma jol usynylady.

- Jol paıdalanýshylarǵa saparlaryńyzdy aldyn ala josparlap, jóndeý jumystary júrip jatqan ýchaskede jol belgileriniń talaptaryn saqtaýdy suraımyz, - delingen aqparatta.

Aıta keteıik, elimizdegi avtojoldardyń sapasyn baqylaý úshin 220 avtojúıe ornatylady.