Podkast pen ánderdegi balaǵat sózder: zańǵa qaıshy kontentke qandaı shara qoldanylady
ASTANA. KAZINFORM – QR Mádenıet jáne aqparat mınıstrligi podkast, mýzykalyq shyǵarma jáne ózge de oıyn-saýyq kontentinde balaǵat sózder men beıádep leksıkany qoldanýǵa qatysty talaptardy túsindirdi.
Aqparat komıtetiniń tóraǵasy Álisher Muqajannyń aıtýynsha, podkast, mýzykalyq shyǵarma jáne ózge de oıyn-saýyq kontentin ázirlep, taratý kezinde Qazaqstan zańnamasynyń talaptary saqtalýǵa tıis.
– Internet pen áleýmettik jelilerde balaǵat sózder, beıádep leksıka jáne qoǵamdyq moralǵa qaıshy kontent taratýǵa zańnamalyq shekteýler qoıylǵan. Mınıstrlik buqaralyq aqparat quraldary men onlaın-platformalarda zań talaptarynyń saqtalýyn baqylap, ondaǵy kontentke turaqty túrde monıtorıng júrgizedi, - dedi spıker.
Mınıstrlik usynǵan derekke sáıkes, 2025 jylǵy 1 qańtardan 2026 jylǵy 10 tamyzǵa deıin onlaın-platformalarda balaǵat sózder bar 161 materıal anyqtalǵan. Onyń 66-sy byltyr tirkelse, bıyl 10 tamyzǵa deıin 95 materıal anyqtaldy.
Osy kezeńde anyqtalǵan materıaldardyń 62-si óshirilgen.
Komıtet tóraǵasynyń sózinshe, eger materıal zań talaptaryna qaıshy dep tanylsa, ony óshirý nemese oǵan qoljetimdilikti shekteý úshin onlaın-platformalardyń belgilengen tetikteri arqyly tıisti habarlamalar men talaptar joldanady.
– Qandaı shara qoldanylatyny anyqtalǵan kontenttiń sıpaty men zańda kózdelgen negizderge baılanysty. Al materıalda qylmystyq nemese ákimshilik quqyqbuzýshylyq belgileri bolǵan jaǵdaıda tıisti sheshim qabyldaý úshin quqyq qorǵaý organdaryna habarlama jiberiledi, – dedi Álisher Muqajan.
Aıta keteıik, buǵan deıin ınternette balaǵat sóz aıtqandarǵa 86 myń teńge aıyppul engiziletini habarlandy.
