PMI jobasy: Qazaqstanda aýktsıondyq kvota bólý tetigi engizilýi múmkin
ASTANA. KAZINFORM — Ekologııa jáne tabıǵı resýrstar mınıstrliginde Dúnıejúzilik bank ókilderiniń qatysýymen Partnership for Market Implementation (PMI) jobasyn iske asyrý máseleleri boıynsha kezdesý ótti.
Vedomstvonyń baspasóz qyzmeti málim etkendeı, kezdesý barysynda jobanyń aǵymdaǵy mártebesi, jumystyń basym baǵyttary, sondaı-aq Qazaqstandaǵy parnıktik gazdar shyǵaryndylaryna kvotalar saýdasy júıesin jetildirý boıynsha aldaǵy qadamdar qaraldy.
— PMI jobasy kómirtekti baǵa belgileý quraldaryn damytýǵa, shyǵaryndylar saýdasynyń ulttyq júıesiniń tıimdiligin arttyrýǵa jáne Qazaqstan Respýblıkasynyń klımattyq saıasatyn qoldaýǵa baǵyttalǵan, — delingen habarlamada.
Aýktsıondyq kvota bólý tetigin engizý, benchmarkıng júıesin jetildirý, naryqtyq turaqtylyq tetikterin damytý, sondaı-aq ınstıtýtsıonaldyq áleýetti nyǵaıtý máselelerine erekshe nazar aýdaryldy.
Kezdesý qorytyndysy boıynsha taraptar jobany tıimdi iske asyrý maqsatynda odan ári ózara is-qımyl jasaýǵa daıyn ekenderin rastady.
Buǵan deıin Astanada ekologııalyq standartqa saı emes júk kólikterin elge zańsyz ákelgen qylmystyq top áshkerelengenin jazdyq.
