Platını FIFA prezıdenttigi saılaýyna qatyspaıtynyn aıtty
ASTANA. QazAqparat - ÝEFA prezıdenti Mıshel Platını 2015 jyldyń mamyrynda ótetin FIFA prezıdenttigi saılaýyna óziniń kandıdatýrasyn usynbaıtynyn málimdedi. Bul týraly VVS-ge siltememen egemen.kz habarlady.
Buǵan, sirá, Halyqaralyq fýtbol federatsııasyn 16 jyl boıy úzilissiz basqaryp kele jatqan Zepp Blatterdiń besinshi merzimge báıgege túsýge nıetti ekenin budan buryn baıandap úlgergeni sebep bolǵan shyǵar.
59 jastaǵy Mıshel Platını - HH ǵasyrdyń eń úzdik fýtbolshylarynyń biri. Tegi ıtalıan ol Frantsııa quramasy sapynda oınady. Qazir ÝEFA-ǵa basshylyq etip kele jatqan fýtbol fýnktsıoneri taıaýda Monte-Karloda ótken Eýropa fýtbol qaýymdastyǵy odaǵynyń 54-shi kezdesýinde bar nazary men kúsh-jigerin osy laýazymyna jumsaı beretinin aıtty.
Bı-bı-sı tilshisi Rıchard Konveıdiń habarlaýynsha, Platınıdiń jıyndaǵy bul málimdemesin jınalǵandar qol shapalaqtap qarsy alǵan.
Al maýsym aıynda ǵana frantsýz fýtbol mamany FIFA-ǵa «taza aýa lebi» kerek bolǵandyqtan, onyń kandıdatýrasyn qoldamaıtynyn ashyp aıtqan edi.
Endigi basty suraq FIFA prezıdenttigine úmitkerler qataryna ÝEFA óz adamyn usyna ma, joq pa, osyǵan tirelip turǵan sııaqty. Munyń máni mynada, qazir kári qurlyqtaǵy elder fýtbol odaqtarynyń kópshiligi Blatterdi qoldaı qoımaıdy. Olardyń birazy Brazılııada ótetin álem chempıonatynyń aldynda-aq odan otstavkaǵa ketýdi talap etken edi.
78 jastaǵy Zepp Blatter sońǵy jyldary kóptegen jemqorlyq janjaldarǵa ushyrap qalyp júr. Solardyń sońǵysy Katarǵa 2022 jyly álem chempıonatyn ótkizý múmkindigin berýine baılanysty týyndady.
