Plastıkti almastyra alatyn ónim bar ma
ASTANA. QazAqparat - Búgingi tańda álemde plastıktiń qorshaǵan ortaǵa keri áseri men ekologııaǵa keltirip jatqan zııany týraly kóp aıtylyp júr. VVS basylymy bul ekologııalyq problemany sheshý úshin plastıkti qandaı tabıǵı ónimdermen almastyrýǵa bolatynyna jaýap izdep kóripti.
«Polıetılen paketter men plastık bótelkelerdiń zııanyn bilsek te, biz olarǵa senip alǵanbyz. Kólik pen óndiriste te, tipti, qoǵamdyq tamaqtaný oryndarynda da plastık kóremiz al olarmen kúresý osy materıaldyń ózin ózgertýdi qajet etetindeı», deı kele avtor ǵalymdar, ınjenerler men dızaınerlerdiń plastıktiń ekologııalyq taza alternatıvasyn izdep jatqanyn jazady.
«Mysaly, júgeri men kartop krahmalynan alynǵan polımerden jasalǵan ónimder plastmas sanyn azaıtyp qana qoımaı, jerge sińgen kezde topyraqty qunarlandyra alady. Al lavadan alynǵan «tas maqtadan» jasalǵan ónim kez kelgen aýa raıynda saqtalyp tura alady. Sońǵy kezderi «tas maqta» ekologııalyq taza ónimdi qoldaıtyn arhıtektorlar men dızaınerler jumysynda kóp qoldanylyp júr. Sondaı-aq syra zaýyttaryndaǵy qaldyqtardan jasalǵan kirpish te plastıkti almastyra alady», dep jazady basylym.
Avtordyń aıtýynsha, plastmas óndirisine qajetti munaıdy alý ekologııaǵa keri áser etedi. «Al plastıkti ýtılızatsııalaýdyń zardaby tipti jaman: toksındi hımııalyq elementter azyq túlikke, aýyz sýǵa túsedi», deıdi avtor.
