Plastıkalyq otadan kóz jumǵan áıel: hırýrg qandaı dıagnoz qoıǵan
ALMATY. QazAqparat - Almatyda plastıkalyq otadan kóz jumǵan Ýkraına azamatshasynyń ólimi boıynsha sot jalǵasyp jatyr. Búgin sotta hırýrg sóıledi, dep habarlaıdy QazAqparat tilshisi sot zalynan.
Aıyptaý aktisine sáıkes, Dana Agamýradova medıtsınalyq kómek kezinde jiberligen birneshe qatelikten kóz jumǵan. Áıeldiń ishinen, ıyǵynan, arqasynan maı alý kezinde maı túıirshikteri ókpe tamyrlaryn bitep qalǵan.
«Qaza bolǵan áıeldiń anamnezinde baýyr aýrýy jazylǵan. Baýyry aýyratyny jóninde ol hırýrg Dmıtrıı Pısarevke aıtqan. Al hırýrg anestezıolog-reanımatolog bolmasa da, jansyzdandyrý dárisin ózi salǵan. Operatsııa «Tsentr Estetıkı Olgı Rýbas» JShS protsedýralyq kabınetinde qoldan quralǵan apparatpen jasalǵan. Otadan soń áıeldiń jaǵdaıy nasharlaǵanda emhanada reanımatsııalyq shara jasaıtyn mamandar bolmaǵan soń, «Avtorlyq medıtsına» JShS emhanasyna jetkizilgen. Dana Agamýradova der kezinde medıtsınalyq kómek alý múmkindiginen qaǵyldy. Sonyń kesirinen ol qaıtys boldy», - dedi memlekettik aıyptaýshy.
Hırýrgtyń aıtýynsha, áıel tek symbatyn qalpyna keltirýdi suraǵan. Al densaýlyǵynda kinárat baryn aıtpaǵan.
«Otanyń aldynda oǵan barlyq qaýip-qater týraly eskertildi. «Asqynýy múmkin» degen qujatqa qol qoıdy. Barlyq plastıkalyq otalar josparly túrde jasalady ári oǵan patsıent bar analızin tapsyryp, daıyn keledi. Patsıent jartylaı jansyzdandyrýmen júrgiziletin otaǵa qajetti barlyq taldaýdan ótti», - dedi Pısarev.
«Bunyń bir artyqshylyǵy - patsıent esinen tanbaıdy. Onyń jaǵdaıyn surap sóılesýge bolady. Sonymen qatar, onyń denesin ary-beri qozǵaýǵa múmkindik týady. Sýdıanyń nazaryn mynaǵan aýdarǵym keledi, asqynǵan gepatıt tolyq anestezııa kezinde qaýipti bolýy múmkin. Sol úshin men jartylaı jansyzdandyrýdy tańdadym. Kýáger retinde qatysqan sarapshy da asqynǵan gepatıtttiń jartylaı jansyzdandyrý úshin esh kedergi keltirmeıtinin aıtty», - dedi hırýrg.
Dáriger áıelge І dárejeli semizdik degen dıagnoz qoıǵan.
«Aýrý tarıhyna maǵan dıagnoz jazý kerek boldy. Ol bizge symbatyn qalpyna keltirý úshin kelgendikten, І dárejedegi semizdik degen dıagnoz qoıdym», - dedi hırýrg.
Qylmystyq isti qaraý 22 qarashada jalǵasatyn boldy.
Aıta ketý kerek, qaıǵyly jaǵdaı Almatyda eki jyl buryn bolǵan edi. Ýkraına azamatshasy Dana Agamuradova lıposaktsııa (ish maıyn alǵyzý) úshin jekemenshik emhanalardyń birinde ota jasatqan. Alaıda áıel ota ústelinde esin jımaǵan kúıi dúnıeden ótti. Qazir ota jasaǵan hırýrg Dmıtrıı Pısarev sot aldynda jaýap berýde. Oǵan qarsy QR QK 317-babynyń 3-bólimimen (óz mindetin durys atqarmaý kesirinen adam ólimine ákelý) aıyp taǵyldy.
Jaqynda osyǵan uqsas jaǵdaı Almatyda taǵy qaıtalanǵan bolatyn. Almaty emhanalarynyń birinde 30 jastaǵy kelinshek otadan soń esin jımastan kóz jumdy. Eki otany da reseılik hırýrg Dmıtrıı Pısarev jasaǵan.
