Plastıkalyq otadan keıingi áıel ólimi: sotta oqıǵanyń mán-jaıy aıtyldy
ALMATY. QazAqparat - Almatyda Almaly aýdany sotynda plastıkalyq otadan soń qaıtys bolǵan Ýkraına azamatshasy Dana Agamýradovanyń isi boıynsha sot jalǵasyp jatyr, dep habarlaıdy QazAqparat tilshisi.
Іs boıynsha sot aldynda plastıkalyq hırýrg Dmıtrıı Pısarev jaýap berýde.
Dmıtrıı Pısarevke QR QK 317-babynyń 3-bólimimen (óz mindetin durys atqarmaýynyń kesirinen adam ólimine ákelý) aıyp taǵyldy.
Sot talqylaýy barysynda marqumda baýyry aýyrady degen dıagnoz bolǵany anyqtalǵan. Áıel óz dıagnozy týraly Pısarevke aıtqan. Dana Agamýradovanyń qorǵaýshysynyń aıtýynsha, gepatıt S juqpasy bolsa, hırýrg ota jasamaýy tıis edi.
Al Pısarevtyń qorǵaýshysy kerisinshe S juqpasy bar adamǵa ota jasaýǵa tyıym salynbaıtynyn aıtty.
Sotta belgili bolǵandaı, hırýrg kásibı mindetine jatpasa da anestezıolog-reanımatolog qyzmetin ózi atqarǵan.
Dana Agamýradova maı túıirshikteri ókpe tamyryn bitep qalǵandyqtan kóz jumǵan.
«Mundaı jaǵdaılar jergilikti nemese jalpy narkozǵa qaramastan bolýy yqtımal nárse. Osy jaıttyń aldyn alý múmkin bolmady. Men eshqandaı normany buzbadym», - dedi D. Pısarev.
Sonymen qatar qorǵaýshylardyń aıtýynsha, Dana Agamýradovanyń otasy hırýrgııalyq otaǵa arnalǵan jerde jasalmaǵan. «Tsentr Estetıkı Olgı Rýbas» emhanasynyń protsedýralyq kabınetinde qoldan quralǵan apparatpen jasalǵan.
Qaıǵyly oqıǵa 2016 jyly bolǵan edi.
Aıta ketý kerek, jaqynda osyǵan uqsas jaǵdaı boldy. Almaty emhanalarynyń birinde 30 jastaǵy kelinshek otadan soń esin jımastan kóz jumǵan bolatyn.
